వాణిజ్య సేవలకు సిద్ధమవుతున్న జీఎస్‌ఎల్‌వీ-ఎంకే3

ఈనాడు, బెంగళూరు: భారతీయ ‘బాహుబలి’ వాహకనౌకగా అభివర్ణించే జీఎస్‌ఎల్‌వీ-ఎంకే3 ఈ నెల 22న ప్రపంచ వాణిజ్య విపణిలోకి అడుగుపెట్టనుంది. ఆ రోజు అర్ధరాత్రి 12:12 గంటలకు బ్రిటిష్‌ అంతరిక్ష అంకుర సంస్థ వన్‌వెబ్‌కు చెందిన 36 బ్రాడ్‌బ్యాండ్‌ ఉపగ్రహాలను శ్రీహరికోట అంతరిక్ష కేంద్రం నుంచి మోసుకెళ్లనుంది. న్యూస్పేస్‌ ఇండియా లిమిటెడ్‌ (ఎన్‌ఎస్‌ఐఎల్‌)- ఇస్రోల ఒప్పందంలో భాగంగా ఈ ప్రయోగాన్ని చేపట్టనున్నారు. నాలుగు టన్నుల బరువున్న ఉపగ్రహాలను జియోసింక్రనస్‌ ట్రాన్స్‌ఫర్‌ ఆర్బిట్‌ (జీటీఓ)లో ప్రవేశపెట్టే ఈ ప్రయోగం ఎన్‌ఎస్‌ఐఎల్‌, ఇస్రో చరిత్రలో మైలురాయి అని ఎన్‌ఎస్‌ఐఎల్‌ చైర్మన్‌ డి.రాధాకృష్ణన్‌ తెలిపారు. ఈ వాహకనౌకను లాంచ్‌ వెహికిల్‌ మార్క్‌-3గా కూడా పిలుస్తారు. దేశానికి చెందిన భారతి ఎంటర్‌ప్రైజెస్‌ ఈ ప్రయోగానికి నిధులు సమకూర్చింది.