గోశాలకు నాలుగున్నర ఎకరాలు.. ముస్లిం వ్యక్తి విరాళం

కర్ణాటకలో మహ్మద్‌ నజీర్‌ అనే ఓ ముస్లిం వ్యక్తి చూపిన దాతృత్వానికి ప్రశంసలు కురుస్తున్నాయి. గోశాల నిర్మాణానికి రూ.2 కోట్ల విలువైన నాలుగున్నర ఎకరాల భూమిని విరాళంగా ఇచ్చారు. మహ్మద్‌ నజీర్‌.. కాఫీ గింజల వ్యాపారం చేస్తున్నారు. ఆయన విరాళంగా ఇచ్చిన స్థలంలో గోశాలతో పాటు అనాథ శరణాలయం, వృద్ధాశ్రమం, పంచముఖి ఆంజనేయ స్వామి దేవాలయం కట్టనున్నారు. కాడూరు-మంగళూరు జాతీయ రహదారి-173 పక్కనున్న ఆ భూమి విలువ దాదాపు రూ.2 కోట్లు వరకు ఉంటుంది. ఈ భూమిని చిక్కమగళూరుకు చెందిన స్వామి సమర్థ్‌ రామదాస ట్రస్ట్‌కు దానంగా ఇచ్చారు ‘నా తల్లికి క్యాన్సర్‌ ఉండేది. అమెతో ఓసారి గోమూత్రం తాగించాను. దీంతో వ్యాధి నయమైంది. ఆ గోమాత రుణం తీర్చుకోవడానికి నా వంతు సాయంగా స్థలాన్ని ఇచ్చాను’’ అని నజీర్‌ తెలిపారు. నజీర్‌ దాతృత్వం మతాల మధ్య సామరస్యం పెరిగేందుకు దోహదం చేస్తుందని పలువురు అభినందిస్తున్నారు.