Tamil Nadu: 13 కి.మీ. సముద్రంలో ఈది.. తమిళనాడు చేరిన శ్రీలంక యువకుడు

వేలచ్చేరి, న్యూస్‌టుడే: శ్రీలంక నుంచి తన కుటుంబంతో పడవలో సముద్ర మార్గాన తమిళనాడు తీరానికి చేరుకునే క్రమంలో ఓ యువకుడు సముద్రంలోకి దూకేశాడు. రామేశ్వరం తీరం వరకు సుమారు 13 కి.మీ. ఈదుకుంటూ వచ్చిన 24 ఏళ్ల ఆ యువకుడిని ఆదివారం అదుపులోకి తీసుకుని అక్కడి తీర గస్తీదళాలు విచారణ ప్రారంభించాయి. అతడి నుంచి గడువు ముగిసిన శ్రీలంక పాస్‌పోర్టును స్వాధీనం చేసుకున్నట్లు పోలీసులు సోమవారం ప్రకటించారు. శ్రీలంకలోని తలైమన్నార్‌ నుంచి వచ్చిన ఈ వ్యక్తి వెంట బోటులో అతని భార్య, ముగ్గురు పిల్లలు, మరో వ్యక్తి ఉన్నారని తెలిపారు. వీరిని రామనాథపురం జిల్లా మండపం క్యాంపులో ఉంచారు.