Vande Bharat trains: ఇక ‘వందే భారత్‌’ సరకు రవాణా రైళ్లు

 తొలిగా దిల్లీ-ముంబయి మధ్య అందుబాటులోకి

దిల్లీ: దేశంలో మూడు వందే భారత్‌ రైళ్లు ఇప్పటికే పట్టాలపై పరుగులు తీస్తుండగా.. నాలుగో రైలును గురువారం ప్రారంభించనున్నారు. ఈ క్రమంలో త్వరలోనే సరకు రవాణాకూ ‘వందే భారత్‌’ తరహా రైళ్లను తీసుకురావాలని రైల్వే శాఖ యోచిస్తోంది. తక్కువ సమయంలో సరకు రవాణా చేసేందుకుగానూ ఈ హైస్పీడ్‌ పార్సిల్‌ రైలు సేవలను మొదలుపెట్టాలని భావిస్తున్నట్లు రైల్వే వర్గాల సమాచారం. తొలి దశలో భాగంగా దిల్లీ ఎన్‌సీఆర్‌ నుంచి ముంబయి వరకు సరకు రవాణా రైలును అందుబాటులోకి తీసుకురానున్నట్లు సమాచారం. గంటకు 160 కిలోమీటర్ల వేగంతో దూసుకెళ్లేలా ఈ రైళ్లను తయారుచేస్తున్నారు. రైలులోని ఒక్కో కోచ్‌లో 1,800 మిల్లీమీటర్ల వెడల్పుతో ఉండే ఆటోమేటిక్‌ స్లైడింగ్‌ ప్లగ్‌ డోర్లు ఉంటాయట. పార్సిళ్లను సులువుగా లోడింగ్‌ / అన్‌లోడింగ్‌ చేసేలా రోలర్‌ ఫ్లోర్‌ సిస్టమ్‌ ఏర్పాటు చేస్తారట.

నేడు నాలుగో రైలును ప్రారంభించనున్న ప్రధాని

ప్రధానమంత్రి నరేంద్రమోదీ గురువారం నాలుగో వందే భారత్‌ రైలును ప్రారంభించనున్నారు. దిల్లీ, హిమాచల్‌ప్రదేశ్‌లోని అందౌరా రైల్వే స్టేషన్‌ మధ్య నడిచే ఈ రైలును.. ఉనా జిల్లాలో గురువారం ప్రధాని జెండా ఊపి ప్రారంభిస్తారు.