SBI: లోన్‌ ఇవ్వకుంటే.. బ్యాంకును పేల్చేస్తా.. ఎస్‌బీఐకు బెదిరింపు ఫోన్‌ కాల్‌

ముంబయి: స్టేట్‌ బ్యాంక్‌ ఆఫ్‌ ఇండియా (ఎస్‌బీఐ)కు గుర్తుతెలియని వ్యక్తి ఫోన్‌ చేసి బెదిరించాడు. తనకు రూ.10 లక్షల రుణం మంజూరు చేయాలని, లేకుంటే బ్యాంకు ఛైర్మన్‌ దినేశ్‌ ఖారాను అపహరించి, హతమార్చడమే కాకుండా... బ్యాంకు కార్పొరేట్‌ కార్యాలయాన్ని పేల్చేస్తానంటూ హెచ్చరించాడు. ఈ మేరకు దక్షిణ ముంబయిలోని నారీమన్‌ పాయింట్‌లో ఉన్న ఎస్‌బీఐ ఛైర్మన్‌ వ్యక్తిగత సహాయకుని కార్యాలయానికి బుధవారం ఫోన్‌ వచ్చింది. ఈ విషయమై బ్యాంక్‌ సెక్యూరిటీ మేనేజర్‌ అజయ్‌ కుమార్‌ శ్రీవాస్తవ.. మెరైన్‌ డ్రైవ్‌ పోలీసులకు ఫిర్యాదు చేశారు. పశ్చిమ బెంగాల్‌ నుంచి ఈ కాల్‌ వచ్చినట్టు పోలీసులు ప్రాథమికంగా గుర్తించారు. నిందితుడిని పట్టుకునేందుకు ఓ బృందాన్ని అక్కడికి పంపారు.