Fire Haircut: వికటించిన ఫైర్‌ హెయిర్‌కట్‌!

వల్సాద్‌: ఇటీవల ప్రాచుర్యం పొందిన ‘ఫైర్‌ హెయిర్‌కట్‌’ వికటించి, ఓ యువకుడికి తీవ్రస్థాయిలో కాలిన గాయాలయ్యాయి! గుజరాత్‌లోని వల్సాద్‌ జిల్లా వాపిలో ఈ ఘటన చోటుచేసుకొంది. ఈ విధానంలో ముందుగా జుట్టుకు రసాయనం పూసి, మంట అంటిస్తారు. ఆ తర్వాత కోరుకున్న ఆకృతి వచ్చేలా క్షవరం చేస్తారు. 18 ఏళ్ల యువకుడు ఫైర్‌ హెయిర్‌కట్‌ చేయించుకునేందుకు బుధవారం ఓ క్షౌరశాలకు వెళ్లాడు. సెలూన్‌ యజమాని అతని జుట్టుకు నిప్పు అంటించగానే భారీగా మంటలు రేగాయి. వాటిని అదుపులోకి తెచ్చేందుకు ప్రయత్నించినా కొద్దిసేపటి వరకూ సాధ్యం కాలేదు. అప్పటికే ఆ యువకుడి తల, మెడ, ఛాతీ భాగాలకు మంటలు వ్యాపించి, తీవ్రంగా గాయాలయ్యాయి. దీంతో వెంటనే అతడిని వల్సాద్‌ సివిల్‌ ఆసుపత్రికి తీసుకెళ్లారు. పరిస్థితి ఆందోళనకరంగా ఉండటంతో అక్కడి నుంచి సూరత్‌లోని ఆసుపత్రికి తరలించారు.