Ceiling fan: ఆ పరికరం వాడితే ఫ్యానుకు ఉరేసుకోలేరు

ఈనాడు, బెంగళూరు: తాము ఉత్పత్తి చేస్తున్న ఒక పరికరాన్ని వాడితే సీలింగ్‌ ఫ్యానుకు ఉరి తాడు బిగించి వేళ్లాడినా అది మరణానికి దారి తీయదని చెబుతోంది ఓ కంపెనీ. ప్రముఖ ఎలక్ట్రిక్‌ ఉత్పత్తుల తయారీ సంస్థ సేఫ్‌ హోలో తయారు చేసిన ఓ ఫ్యాన్‌ డివైజ్‌ను (పరికరం) వినియోగిస్తే ఆత్మహత్యలకు పాల్పడటం సాధ్యపడదు.

ఈ వినూత్న ఉత్పత్తిని బెంగళూరులో నిర్వహిస్తున్న పెట్టుబడిదారుల సమావేశంలో ప్రదర్శించారు. సేఫర్‌ ఫ్యాన్‌ పేరిట రూపొందించిన ఈ డివైజ్‌లో అమర్చిన సేఫ్‌ క్లాంప్‌లో ఉన్న స్ప్రింగ్‌... 20 కిలోల కంటే ఎక్కువ బరువున్న వస్తువు వేలాడుతూ నిదానంగా జారిపోతుంది. పైగా ఇందులో అమర్చిన అలారం బరువైన వస్తువులు వేలాడితే పెద్దగా మోగుతుంది. పైకప్పునకు నేరుగా ఈ సేఫర్‌ క్లాంప్‌తో ఫ్యాన్‌ను బిగిస్తే చాలని సంస్థ టెక్నికల్‌ డైరెక్టర్‌ సుమంత్‌ తెలిపారు. వీటిని ఇప్పటికే 1.2 లక్షలు విక్రయించినట్లు ఆయన తెలిపారు.