అధికారిక గుర్తుపై ట్విటర్‌ వెనక్కి

కొన్ని గంటల్లోనే ఉపసంహరణ

దిల్లీ: బ్లూటిక్‌ తరహాలోనే ప్రభుత్వంలోని ముఖ్య వ్యక్తులను గుర్తించేందుకు ‘అధికారిక’ గుర్తును ప్రకటించిన ట్విటర్‌.. అది ప్రారంభించిన కొన్ని గంటల్లోనే వెనక్కి తీసుకుంది. ప్రధానమంత్రి నరేంద్ర మోదీ సహా పలువురు మంత్రుల ట్విటర్‌ ఖాతాలకు బుధవారం బ్లూటిక్‌కు అదనంగా ‘అధికారిక’ (అఫీషియల్‌) పేరుతో ఓ గుర్తును చేర్చింది. అయితే ఈ గుర్తు చాలా మంది ప్రభుత్వేతర వ్యక్తుల ఖాతాల్లోనూ కనిపించడంతో గందరగోళం నెలకొంది. దీంతో కొన్ని గంటల్లోనే ‘అధికారిక’ గుర్తును వెనక్కి తీసుకుంటున్నట్లు ట్విటర్‌ ప్రకటించింది. ఈ సామాజిక మాధ్యమ సంస్థను కొనుగోలు చేసిన అమెరికా కుబేరుడు ఎలాన్‌ మస్క్‌ కూడా కొత్త గుర్తుతో ఆశించిన ఫలితాలు రాలేదని, అందుకే ఉపసంహరించుకుంటున్నామని తెలిపారు. అయితే రానున్న రోజుల్లో ఇలాంటి మూర్ఖపు నిర్ణయాలు చాలా తీసుకుంటామని చెప్పారు.