ఏనుగును పెంచుతున్నారంటూ ఎమ్మెల్యేపై దాడి

చిక్కమగళూరు, న్యూస్‌టుడే: ఎమ్మెల్యే పెంచుతున్న ఏనుగు తమను తొక్కి చంపుతోందంటూ కొందరు గ్రామస్థులు... ఆయనపై దాడికి పాల్పడ్డారు. ఈ సంఘటన కర్ణాటకలో చోటుచేసుకుంది. చిక్కమగళూరు జిల్లా మూడిగెరె తాలూకా హుల్లేమనె కుందూరు గ్రామానికి చెందిన సతీశ్‌గౌడ, శోభ భార్యాభర్తలు.

పశువుల గడ్డి కోసుకొచ్చేందుకు ఆదివారం ఉదయం ఇద్దరూ గ్రామ సమీపంలోని పొలానికి వెళ్లారు. అక్కడ ఏనుగు దాడిచేసి శోభను చంపేసింది. పరిహారం ఇవ్వాలని అటవీశాఖ సిబ్బందిని కోరుతూ శోభ కుటుంబ సభ్యులు, గ్రామస్థులు ఆదివారం రాత్రి దాకా ధర్నా చేశారు. దీంతో గ్రామంలో తీవ్ర ఉద్రిక్తత నెలకొంది. మూడిగెరె భాజపా ఎమ్మెల్యే ఎం.పి.కుమారస్వామి బాధితులను పరామర్శించేందుకు రాత్రి 7 గంటలకు గ్రామానికి వెళ్లారు. ఎమ్మెల్యే ఏనుగును పెంచుతున్నారని, అది స్థానికులపై దాడి చేస్తోందని ఆరోపిస్తూ గ్రామస్థులు కొందరు కుమారస్వామిని చుట్టుముట్టి దాడికి పాల్పడ్డారు. స్థానికులపై పోలీసులు లాఠీఛార్జి చేసి, ఎమ్మెల్యేను రక్షించి, జీపు ఎక్కించి పంపించారు. సోమవారం మధ్యాహ్నం జరిగిన శోభ అంత్యక్రియలకు ఎమ్మెల్యే హాజరయ్యారు. వంద మందికిపైగా అనుచరులు, పోలీసు భద్రత నడుమ అంత్యక్రియలు ముగిసేదాకా గ్రామంలో ఉండి తిరిగి వెళ్లారు.