అల్లుడి పెద్ద గిల్లుడు!

మామకు చెందిన రూ.107 కోట్ల సంపద స్వాహా

తిరువనంతపురం: పిల్లనిచ్చిన మామ ఆస్తికే ఎసరు పెట్టాడో అల్లుడు. ఏకంగా రూ.100 కోట్లకుపైగా స్థిర, చరాస్తులు కొల్లగొట్టేశాడు. పోలీసుల వివరాల ప్రకారం.. దుబాయ్‌లో ఉండే అబ్దుల్‌ లాహీర్‌ హసన్‌ అనే వ్యాపారవేత్త.. కేరళకు చెందిన మహమ్మద్‌ హఫీజ్‌కు 2017లో తన కుమార్తెనిచ్చి వివాహం జరిపించారు. ఆ సమయంలో వెయ్యి సవర్ల బంగారాన్ని తన బిడ్డకు బహుమతిగా ఇచ్చారు. ఈ క్రమంలోనే మామ ఆస్తిపై కన్నేసిన అల్లుడు.. క్రమంగా మామ ఆస్తులను తన పేరు మీద మార్చుకోవడం ప్రారంభించాడు. ఇలా సుమారు రూ.107 కోట్ల విలువైన స్థిర, చరాస్తులను కాజేశాడు. అల్లుడి మోసాన్ని గ్రహించిన  హసన్‌.. మూడు నెలల క్రితమే కేరళలోని అలువ పోలీస్‌స్టేషన్‌లో ఫిర్యాదు చేశారు. అయినా ఇప్పటి వరకూ పరారీలో ఉన్న నిందితుడిని అరెస్టు చేయడంలో వారు విఫలమైనట్లు ఆయన ఓ వార్తాసంస్థతో మాట్లాడుతూ ఆవేదన వ్యక్తం చేశారు.