అంతర్జాతీయ సంస్థల్లో సంస్కరణలు రావాలి: అమితాబ్‌ కాంత్‌

పోర్ట్‌బ్లెయిర్‌: అంతర్జాతీయ సంస్థలన్నింటిలో సంస్కరణలు రావాల్సిన అవసరం ఉందనీ, ఉమ్మడి లక్ష్యాలను చేరుకునేలా వేర్వేరు దేశాల కూటములు పాటుపడాలని నీతి ఆయోగ్‌ ముఖ్య కార్యనిర్వహణాధికారి (సీఈవో) అమితాబ్‌ కాంత్‌ పేర్కొన్నారు. జి-20 కూటమి సారథ్య బాధ్యతల్ని భారత్‌ చేపట్టబోతున్న తరుణంలో శనివారం అండమాన్‌ నికోబార్‌ దీవుల్లోని హేవ్‌లాక్‌ ఐలాండ్‌లో నిర్వహించిన కార్యక్రమంలో ఆయన ప్రసంగించారు. ప్రాధాన్యాలు సమ్మిళితంగా ఉండాలనీ, వాతావరణ మార్పులను ఎదుర్కొనేందుకు నిధుల సమీకరణలో సుస్థిర అభివృద్ధి సాధించాలని కాంత్‌ చెప్పారు. జి-20 సారథ్యంపై బ్రిటన్‌, రష్యా, జర్మనీ, ఆస్ట్రేలియా దేశాల దౌత్యవేత్తలకు ఆయన వివరించారు. సంస్కరణలు, కార్యాచరణ కేంద్రంగా జి-20ని మలచాలని భారత్‌ భావిస్తున్నందువల్ల ఆ ప్రక్రియలో సభ్యదేశాలన్నీ కీలకపాత్ర పోషించాలని పిలుపునిచ్చారు. ఉగ్రవాదంపై పోరులోనూ తమతో కలిసి అడుగువేయాలని కోరారు. తొలుత ఈ దీవిలో కాలాపత్తర్‌ బీచ్‌ వద్ద యోగాసనాలు నిర్వహించారు. సాగరతీర పరిశుభ్రతలోనూ ప్రతినిధులు పాల్గొన్నారు.