భారతీయుల్లో అదుపు తప్పుతున్న అధిక రక్తపోటు!

దిల్లీ: అధిక రక్తపోటుతో బాధపడుతున్న భారతీయుల్లో 75% మందికి బీపీ అదుపులోకి రావడంలేదని ద లాన్సెట్‌ రీజినల్‌ హెల్త్‌ జర్నల్‌ వెల్లడించింది. బోస్టన్‌ స్కూల్‌ ఆఫ్‌ పబ్లిక్‌ హెల్త్‌, దిల్లీలోని నేషనల్‌ సెంటర్‌ ఫర్‌ డిసీజ్‌ కంట్రోల్‌ పరిశోధకులు సంయుక్తంగా దీన్ని చేపట్టారు. 2001-2020 మధ్య అధిక రక్తపోటుపై చేపట్టిన 51 అధ్యయనాలను విశ్లేషించారు. వీటిలో 15 రాష్ట్రాలు, కేంద్ర పాలిత ప్రాంతాలకు చెందిన మొత్తం 13.90 లక్షల మంది ఆరోగ్య వివరాలున్నాయి. మొదట్లో కేవలం 17.5% మాత్రమే ఉన్న రక్తపోటు నియంత్రణ రేటు... ఆ తర్వాత కొంత మెరుగై 22.5 శాతానికి చేరుకున్నట్టు పరిశోధకులు గుర్తించారు. ‘‘సిస్టాలిక్‌ రక్తపోటు 140, డయాస్టాలిక్‌ రీడింగ్‌ 90 కంటే తక్కువ ఉంటే బీపీ నియంత్రణలో ఉన్నట్టుగా భావించి ఈ విశ్లేషణ సాగించాం. ప్రస్తుతం కేవలం 24.2% మంది బాధితుల్లో మాత్రమే రక్తపోటు నియంత్రణలో ఉంటోంది. బాధితుల్లో కేవలం 46.8% మందికే తమకు హైబీపీ ఉన్నట్టు తెలుసు’’ అని అధ్యయనకర్తలు పేర్కొన్నారు. కేరళకు చెందిన ప్రభుత్వ వైద్య కళాశాల (మంజేరి), కిమ్స్‌ అల్‌-షిఫా స్పెషాలిటీ ఆసుపత్రి (పెరింతల్మన్న) పరిశోధకులు కూడా ఈ విశ్లేషణలో పాలుపంచుకున్నారు. అధిక రక్తపోటుపై ప్రజలకు అవగాహన కలిగించడం ద్వారా హృద్రోగాలను, మరణ ముప్పును గణనీయంగా తగ్గించే అవకాశముందని పరిశోధకులు సూచించారు.