మహిళల రక్షణకు నిర్భయ ‘బ్రేస్‌లెట్‌’

మహిళలపై అఘాయిత్యాలు పెరుగుతున్న నేపథ్యంలో వారి భద్రత కోసం ఉత్తర్‌ప్రదేశ్‌కు చెందిన ఇంజినీరింగ్‌ విద్యార్థినులు ఓ వినూత్న పరికరం తయారు చేశారు. గోరఖ్‌పుర్‌ జిల్లాలోని ఇన్‌స్టిట్యూట్‌ ఆఫ్‌ టెక్నాలజీ అండ్‌ మేనేజ్‌మెంట్‌ ఇంజినీరింగ్‌ కళాశాలలో ఆర్టిఫిషియల్‌ ఇంటెలిజెన్స్‌ చదువుతున్న స్నేహ, అక్షిత ఈ పరికరాన్ని తయారుచేశారు. దీన్ని లాగేందుకు ప్రయత్నం చేసినప్పుడు అందులోంచి కరెంట్‌ విడుదలై షాక్‌ కొట్టేలా బ్యాటరీని ఏర్పాటు చేశారు. ‘‘ఈ పరికరం ఫోన్‌ ద్వారా ఉమెన్‌ సేఫ్టీ యాప్‌నకు అనుసంధానమై ఉంటుంది. మరో ఐదు నంబర్లకు కనెక్ట్‌ అయి ఉంటుంది. ఎప్పుడైనా ప్రమాదం ఎదురైనప్పుడు పరికరంలోని బటన్‌ను రెండు సార్లు నొక్కాలి. వెంటనే ఆ నంబర్లకు కాల్‌తో సహా ఒక సందేశం వెళ్తుంది. ప్రస్తుతం ఉన్న లొకేషన్‌ సైతం షేర్‌ అవుతుంది. ఈ పరికరం బ్లూటూత్‌ ద్వారా పనిచేస్తుంది. దీని ధర రెండు వేల రూపాయలు’’ అని స్నేహ, అక్షిత తెలిపారు.