లవ్‌ జిహాద్‌, మత మార్పిళ్లపై వీహెచ్‌పీ దేశవ్యాప్త ఉద్యమం

దిల్లీ: లవ్‌ జిహాద్‌, బలవంతపు మతమార్పిళ్లపై ప్రజల్లో అవగాహన కల్పించేలా దేశవ్యాప్త కార్యక్రమానికి విశ్వ హిందూ పరిషత్‌ (వీహెచ్‌పీ) గురువారం ఒక కార్యక్రమాన్ని ప్రారంభించింది. ఈ జన్‌ జాగరణ్‌ అభియాన్‌ నెల రోజులపాటు కొనసాగుతుంది. యువతను, మహిళలను చైతన్యపరచడం తమ ఉద్దేశమని సంస్థ సంయుక్త కార్యదర్శి సురేంద్ర జైన్‌ విలేకరుల సమావేశంలో తెలిపారు. బజరంగ్‌దళ్‌ కార్యకర్తలు దేశవ్యాప్తంగా అన్ని బ్లాకుల్లో ఈ నెల 10 వరకు ‘శౌర్య యాత్ర’లు నిర్వహిస్తారని చెప్పారు. ‘దుర్గావాహిని’ ద్వారా యువతుల్లో చైతన్యం తీసుకువస్తామని తెలిపారు. అక్రమ మత మార్పిళ్లపై కేంద్రం ఒక చట్టాన్ని చేయాల్సి ఉందని, దానికి తగ్గ మద్దతు కూడగడతామని వీహెచ్‌పీ తెలిపింది.