తోపుడు బండిపై ఇంటికి మృతదేహం

ఓ గిరిజనుడి మృతదేహాన్ని అతని కుటుంబ సభ్యులు తోపుడు బండిపై ఇంటికి తీసుకు వెళ్లిన దయనీయ ఘటన ఝార్ఖండ్‌లోని లాతేహార్‌ జిల్లాలో చోటు చేసుకుంది. నది పర్బలుమత్‌ పోలీస్‌ స్టేషన్‌ పరిధిలోని బసియా పంచాయితీకి చెందిన చంద్రు లోహ్రా అనే ఓ వ్యక్తి మద్యానికి బానిసై ఆరోగ్యం పాడుచేసుకున్నాడు. దీంతో అతని కుటుంబ సభ్యులు బాలుమత్‌ కమ్యూనిటీ హెల్త్‌ సెంటర్‌లో చేర్పించారు. చికిత్స పొందుతూ చంద్రు ఆసుపత్రిలోనే మృతి చెందాడు. మృతదేహన్ని తరలించేందుకు ఆసుపత్రి యాజమాన్యాన్ని అంబులెన్స్‌ను అడిగారు కుటుంబ సభ్యులు. ఇందుకు యాజమాన్యం నిరాకరించింది. సొంతంగా అంబులెన్స్‌ను సమకూర్చుకునే స్తోమత లేని ఆ కుటుంబం గురువారం రాత్రి ఓ తోపుడు బండిపై మృతదేహన్ని తీసుకెళ్లింది. ఆసుపత్రి ఆవరణలో అంబులెన్స్‌ ఉన్నా యాజమాన్యం తమకు ఎలాంటి సాయం అందించలేదని మృతుడి బంధువులు వాపోయారు.