ఈశాన్య దిల్లీ అల్లర్ల కేసు.. ఉమర్‌ ఖలీద్‌, సైఫీ నిర్దోషులు

దిల్లీ న్యాయస్థానం తీర్పు

దిల్లీ: ఈశాన్య దిల్లీలో 2020లో చోటుచేసుకున్న అల్లర్ల కేసులో జవహర్‌లాల్‌ నెహ్రూ యూనివర్సిటీకి చెందిన మాజీ విద్యార్థి ఉమర్‌ ఖలీద్‌ను కోర్టు నిర్దోషిగా ప్రకటించింది. ఖలీద్‌తో పాటు యునైటెడ్‌ అగైనెస్ట్‌ హేట్‌ ఫౌండర్‌ ఖలీద్‌ సైఫీని సైతం నిర్దోషిగా పేర్కొంది. దిల్లీలో రాళ్లు రువ్విన ఘటనలో వీరిపై పోలీసులు కేసు నమోదు చేశారు. అల్లర్లకు కుట్ర పన్నారన్న అభియోగాలు మోపారు. అయితే, అందుకు తగిన ఆధారాలు లేవంటూ దిల్లీ కోర్టు తాజాగా కొట్టివేసింది. స్పెషల్‌ పబ్లిక్‌ ప్రాసిక్యూటర్‌ మధుకర్‌ పాండే ఈ విషయాన్ని ధ్రువీకరించారు. ప్రస్తుతం వీరిపై వేరే కేసులు నమోదై ఉన్నాయి. దీంతో ఇరువురూ జ్యుడీషియల్‌ కస్టడీలో ఉండనున్నారు.