ఛత్తీస్‌గఢ్‌లో 76 శాతానికి రిజర్వేషన్లు

ఆమోదించిన అసెంబ్లీ

రాయ్‌పుర్‌: ఛత్తీస్‌గఢ్‌లో రిజర్వేషన్ల కోటాను 76 శాతానికి పెంచుతూ.. ఆ రాష్ట్ర శాసనసభ ఏకగ్రీవంగా తీర్మానం చేసింది. ఇందుకు సంబంధించిన రెండు సవరణ బిల్లులను శుక్రవారం జరిగిన అసెంబ్లీ ప్రత్యేక సమావేశంలో సీఎం భూపేశ్‌ బఘేల్‌ ప్రవేశపెట్టారు. వీటిని సభ ఆమోదించడంతో ఇక నుంచి ఆ రాష్ట్రంలో ఉద్యోగాలు, విద్యాసంస్థల ప్రవేశాల్లో రిజర్వేషన్లు 76 శాతానికి పెరగనున్నాయి!. ఈ బిల్లులకు గవర్నర్‌ ఆమోదముద్ర వేయాల్సి ఉంది. ఈ సవరణ బిల్లుల ప్రకారం.. షెడ్యూల్డ్‌ తెగల(ఎస్టీ)కు 32%, ఇతర వెనుకబడిన తరగతుల(ఓబీసీ)కు 27%, షెడ్యూల్డ్‌ కులాల(ఎస్సీ)కు 13%, ఆర్థికంగా వెనుకబడిన తరగతుల(ఈడబ్ల్యూఎస్‌)కు 4% కోటాలభించనుంది.