స్కూల్‌ బ్యాగ్‌లో కుర్చీ.. తయారు చేసిన బాలిక

హిమాచల్‌ప్రదేశ్‌లోని ఉనా జిల్లాకు చెందిన ఏకమ్‌జీత్‌ కౌర్‌ అనే బాలిక ‘మల్టీ స్పెషాలిటీ స్కూల్‌ బ్యాగ్‌’ను తయారుచేసింది. రాక్‌ఫోర్డ్‌ డే పబ్లిక్‌ స్కూల్‌లో చదువుతున్న ఏకమ్‌జీత్‌ ఇటీవలే ఇన్‌స్పైర్‌ స్టాండర్డ్‌ అవార్డ్‌ స్కీమ్‌ పోటీల్లో పాల్గొంది. ఆ సమయంలో ఆమె తయారు చేసిన స్కూల్‌ బ్యాగ్‌ను అక్కడకు తీసుకొచ్చింది. న్యాయనిర్ణేతలకు తన బ్యాగ్‌ ఉపయోగాలను వివరించగా.. వారంతా ఆశ్చర్యపోయారు. ‘‘కొంత మంది పిల్లలు పుస్తకాల సంచులు భుజాన వేసుకుని బస్సు కోసం వేచి ఉండటం చూశాను. అది వాళ్లకు ఇబ్బందిగా ఉండేది. దాంతో ఈ బ్యాగ్‌ తయారుచేశాను’’ అని ఆమె వివరించింది. ఈ సంచిలో ఓ ఫోల్డబుల్‌ కుర్చీ కూడా ఉందని, విద్యార్థులు అవసరమైతే కుర్చీ వేసుకుని కూర్చోవచ్చని చెప్పింది. పుస్తకాల బరువు మోయకుండా.. బ్యాగ్‌ను సులువుగా లాక్కెల్లేందుకు చక్రాలు ఏర్పాటుచేసినట్లు వెల్లడించింది. దీని ధర రూ.500 నుంచి రూ.1,000 మధ్యలో ఉంటుందని ఏకమ్‌జీత్‌ కౌర్‌ చెబుతోంది.