ఆటోడ్రైవర్‌ నిజాయతీ

 ప్రయాణికులు మరిచిపోయిన నగలు తిరిగి అప్పగింత

ఆటోలో ప్రయాణికులు మరిచిపోయిన బంగారు నగలను తిరిగి వారికే అప్పగించి ఓ ఆటోడ్రైవర్‌ తన నిజాయతీని చాటుకున్నారు. ఉత్తరాఖండ్‌లో ఈ ఘటన చోటుచేసుకుంది. నైనితాల్‌ జిల్లాలోని హల్ద్‌వానీలో జరిగిన ఓ వివాహ వేడుకకు కొందరు ఆటోలో బయలుదేరారు. మండపం వద్ద ఆటో దిగారు. నగల సంచిని మరచిపోయారు. ఆ సంచిలో రూ.50 వేల నగదు, రూ.6 లక్షల విలువైన నగలు ఉన్నాయి. అనంతరం వివాహ మండపంలో నగల సంచి ఎక్కడుందని వెతకగా దొరకలేదు. ఇంటికి వెళ్లిన తర్వాత ఆటో డ్రైవర్‌ వల్లభ్‌ జోషి.. వాహనంలో నగల సంచి ఉండడాన్ని గమనించారు. అనంతరం కల్యాణ మండపానికి చేరుకుని పెళ్లి కుమార్తె బంధువులకు ఆ సంచిని అప్పగించారు. దీంతో అందరూ ఆయన్ని అభినందించారు.