వచ్చే నెలలో సీఎస్‌లతో ప్రధాని మోదీ భేటీ

బడ్జెట్‌ నేపథ్యంలోనే

దిల్లీ: కేంద్ర బడ్జెట్‌ 2023-24ను పార్లమెంటులో ప్రవేశపెట్టే సమయం సమీపిస్తున్న నేపథ్యంలో ప్రధానమంత్రి నరేంద్రమోదీ వచ్చే నెలలో అన్ని రాష్ట్రాల ప్రభుత్వ ప్రధాన కార్యదర్శులతో సమావేశం నిర్వహించనున్నారు. రాష్ట్రాలు, కేంద్రపాలిత ప్రాంతాల నుంచి యువ కలెక్టర్లు, వివిధ మంత్రిత్వ శాఖల్లోని అధికారులూ ఈ సమావేశానికి హాజరు కానున్నారు. ప్రభుత్వ ప్రధాన కార్యదర్శుల రెండో జాతీయస్థాయి సమావేశం వచ్చే నెలలో దిల్లీలో జరగనుందని, కేంద్రం-రాష్ట్ర ప్రభుత్వాల మధ్య సంబంధాలను మరింత బలోపేతం చేయడంలో ఇది కీలక ముందడుగు అవుతుందని సోమవారమిక్కడ ఓ సీనియర్‌ అధికారి తెలిపారు. ఫిబ్రవరి ఒకటో తేదీన కేంద్ర ఆర్థిక మంత్రి నిర్మలా సీతారామన్‌ బడ్జెట్‌ను పార్లమెంటులో ప్రవేశపెట్టనున్నారు. హిమాచల్‌ప్రదేశ్‌లోని ధర్మశాలలో ఈ ఏడాది జూన్‌లో ప్రధాని మోదీ ప్రభుత్వ ప్రధాన కార్యదర్శుల తొలి జాతీయస్థాయి సమావేశం నిర్వహించిన సంగతి తెలిసిందే.