విద్య, పరిశోధన రంగాల్లో.. భారత్‌, జర్మనీల మధ్య కీలక ఒప్పందం

దిల్లీ: భారత్‌, జర్మనీ దేశాల ప్రజలు ఒకరి దేశంలో మరొకరు విద్యాభ్యాసం, పరిశోధన, ఉద్యోగాలు చేసుకోవడానికి వీలు కల్పించే కీలక భాగస్వామ్య ఒప్పందంపై రెండు దేశాలు సోమవారం సంతకాలు చేశాయి. భారత విదేశాంగ మంత్రి ఎస్‌.జైశంకర్‌, జర్మనీ విదేశాంగ మంత్రి ఎనలీనా బేయర్‌ బాక్‌లు ఈ మేరకు సోమవారమిక్కడ సమావేశమయ్యారు. ఉక్రెయిన్‌ యుద్ధం, అఫ్గానిస్థాన్‌ పరిస్థితులు, పాకిస్థాన్‌ నుంచి ఎదురవుతున్న సీమాంతర ఉగ్రవాదం వంటి సమస్యలపై చర్చించారు. రెండు రోజుల పర్యటన నిమిత్తం బేయర్‌ బాక్‌ భారత్‌కు వచ్చారు. ఈ సందర్భంగా ఆమె మాట్లాడుతూ.. 21వ శతాబ్దంలో ప్రపంచ వ్యవస్థను, ముఖ్యంగా ఇండో పసిఫిక్‌ స్థితిగతులను తీర్చిదిద్దడంలో భారత్‌ ప్రముఖ పాత్ర పోషిస్తుందని ఉద్ఘాటించారు. భారత్‌ను సందర్శించడమంటే ఆరో వంతు ప్రపంచాన్ని సందర్శించడమేనన్నారు. గత 15 ఏళ్ళలో భారత్‌ 40 కోట్ల మందిని దుర్భర పేదరికం నుంచి బయట పడేయడం నిజంగా అద్భుతమని చెప్పారు. భారతదేశం జర్మనీకి సహజ భాగస్వామి అని అభివర్ణించారు.