పాలు ఇస్తున్న ఏడాది వయసున్న దూడ

ఉత్తర్‌ప్రదేశ్‌ గోరఖ్‌పుర్‌లో ఓ వింత సంఘటన వెలుగులోకి వచ్చింది. సంతానం లేకుండా ఏడాది వయసున్న ఓ దూడ పాలిస్తూ.. అందరిని ఆశ్చర్యానికి గురిచేస్తోంది. ఖోరాబర్‌లోని జార్వా నివాసి గిరి నిషాద్‌  15 రోజుల క్రితం ఓ దూడను తన ఇంటికి తీసుకువచ్చాడు. వారం రోజులు గడిచిన తర్వాత ఆ దూడ పాలు ఇవ్వడం ప్రారంభించింది. మొదట్లో పాలు తక్కువగా ఇచ్చేదని.. ఇప్పుడు 4 లీటర్ల పాలు ఇస్తుందని యజమాని గిరి నిషాద్‌ చెప్పారు. దూడను కుటుంబ సభ్యులు పూజిస్తున్నారు. ఈ వింతను చూసేందుకు గ్రామస్థులు పెద్ద ఎత్తున తరలి వస్తున్నారు. కొందరైతే దూడ నుంచి పాలు తీసి పరీక్షిస్తున్నారు. ‘‘గర్భం లేకుండా పాలు ఇవ్వడం, బిడ్డకు జన్మనిచ్చే ప్రక్రియలు అనేవి హార్మోన్ల మార్పు కారణంగా జరుగుతాయి. ఇంతకు ముందు దూడలో ఏదైనా ఆరోగ్య సమస్య వచ్చినప్పుడు చికిత్సలో భాగంగా వాడిన మందులు కూడా ప్రభావం చూపించవచ్చు’’ అని పశువైద్యుడు యోగేష్‌ సింగ్‌ చెప్పారు.