చోరీ అనుమానంతో చిన్నారికి చెప్పులదండ

బైతూల్‌: సహ విద్యార్థినికి చెందిన రూ.400 డబ్బు అపహరించిందన్న అనుమానంతో అయిదో తరగతి చదువుతున్న ఓ బాలికకు చెప్పులదండ వేసి, దెయ్యంలా అలంకరణ చేసి ఆవరణలో తిప్పిన అమానుష ఘటన మధ్యప్రదేశ్‌ రాష్ట్ర హాస్టలులో వెలుగుచూసింది. హాస్టలు పర్యవేక్షకురాలి ఆధ్వర్యంలో జరిగిన ఈ ఘటనపై బైతూల్‌ జిల్లా కలెక్టర్‌ విచారణకు ఆదేశించారు. దమిజిపుర గ్రామంలోని గిరిజన బాలికల ప్రభుత్వ వసతిగృహం వారం రోజుల కిందట ఈ దుశ్చర్యకు వేదికగా మారింది. బాలిక కుటుంబసభ్యులు మంగళవారం జిల్లా కలెక్టర్‌ అమన్‌వీర్‌ సింగ్‌ను కలిసి ఫిర్యాదు చేయడంతో ఈ విషయం బాహ్య ప్రపంచానికి తెలిసింది. హాస్టలు పర్యవేక్షకురాలిని ఆ విధుల నుంచి తప్పించినట్లు గిరిజన వ్యవహారాల శాఖ అసిస్టెంట్‌ కమిషనర్‌ శిల్పా జైన్‌ తెలిపారు. ఈ ఘటన జరిగిన తర్వాత బాధిత బాలిక హాస్టలులో ఉండేందుకు ససేమిరా అంటున్నట్లు ఆమె తండ్రి తెలిపారు.