మహిళా అధికారుల విషయంలో మీ వైఖరి సరిగా లేదు

సైన్యంపై సుప్రీంకోర్టు వ్యాఖ్యలు

దిల్లీ: మహిళా అధికారుల పదోన్నతుల విషయంలో సైన్యం అనుసరిస్తున్న వైఖరిని సర్వోన్నత న్యాయస్థానం తప్పుపట్టింది. ‘మీ ఇంటిని చక్కదిద్దుకోండి’ అంటూ వ్యాఖ్యలు చేసింది. తమ కంటే జూనియర్లైన పురుష అధికారులకు పదోన్నతులిస్తూ తమకు మాత్రం ఇవ్వడం లేదంటూ 34 మంది మహిళా అధికారులు సుప్రీంకోర్టును ఆశ్రయించారు. దీనిపై శుక్రవారం ప్రధాన న్యాయమూర్తి జస్టిస్‌ డి.వై.చంద్రచూడ్‌ నేతృత్వంలోని ధర్మాసనం విచారించింది. ఈ సందర్భంగా సీజేఐ..‘‘మీరు మహిళా అధికారుల విషయంలో న్యాయంగా ప్రవర్తించడం లేదని మేం భావిస్తున్నాం’’ అని సైన్యం తరఫున హాజరైన న్యాయవాదిని ఉద్దేశించి అన్నారు. మహిళా అధికారుల విషయంలో ఏం చేయాలనుకుంటున్నారో చెప్పాలని పేర్కొన్నారు. అప్పటివరకు పురుష అధికారుల పదోన్నతుల ఫలితాలను వెల్లడి చేయొద్దని ఆదేశించారు.