Haryana: ఇకపై పాఠశాలల్లో భగవద్గీత పఠనం: హరియాణా సీఎం

చండీగఢ్‌: ఇకపై రాష్ట్ర వ్యాప్తంగా పాఠశాలల్లోని విద్యార్థులతో భగవద్గీత శ్లోకాలు పఠింపజేయనన్నట్లు హరియాణా ముఖ్యమంత్రి మనోహర్‌లాల్‌ ఖట్టర్‌ ప్రకటించారు. వచ్చే విద్యా సంవత్సరం నుంచి దీన్ని అమలు చేస్తామని తెలిపారు. శనివారం కురుక్షేత్రలో నిర్వహించిన ‘అంతర్జాతీయ గీతా మహోత్సవ్‌’ కార్యక్రమంలో పాల్గొన్న ఆయన ఈ విషయాన్ని వెల్లడించారు. 

‘భగవద్గీత అనేది కేవలం అర్జునుడి కోసమే కాదు.. మనందరికీ అందించిన సందేశం. కాబట్టి యువత గీతాలోని సారాన్ని గ్రహించి.. నిత్యజీవితంలో భాగం చేసుకోవాలి’’అని సీఎం మనోహర్‌లాల్‌ తెలిపారు. జ్యోతిసర్‌లో 2 ఎకరాల విస్తీర్ణంలో రూ.205కోట్ల వ్యయంతో ‘మహాభారతం’కు సంబంధించిన మ్యూజియం నిర్మిస్తున్నట్లు చెప్పారు. ఇందులో మల్టీమీడియాను ఉపయోగించి.. భగవద్గీత, వైదిక నాగరికత గురించి వివరించనున్నట్లు తెలిపారు. ఏటా నిర్వహించే గీతా మహోత్సవ్‌ను మరింత ఘనంగా నిర్వహించేందుకు ‘గీతా జయంతి’ పేరుతో ఓ కమిటీ ఏర్పాటు చేయనున్నట్లు సీఎం పేర్కొన్నారు. వచ్చే ఏడాది నుంచి ఈ వేడుకల్లో రామ్‌లీలా, కృష్ణ ఉత్సవ్‌ కార్యక్రమాలు నిర్వహిస్తామని సీఎం వెల్లడించారు. 

► Read latest National - International News and Telugu News