Union Cabinet: 63వేల PACSల కంప్యూటరీకరణకు కేంద్ర కేబినెట్‌ ఆమోదం

దిల్లీ: కేంద్ర కేబినెట్‌ కీలక నిర్ణయాలు (Union Cabinet Decisions) తీసుకుంది. దేశవ్యాప్తంగా ఉన్న 63వేల ప్రైమరీ అగ్రికల్చర్‌ క్రెడిట్‌ సొసైటీ(పీఏసీఎస్‌)ల కంప్యూటరీకరణకు ఆమోదముద్ర వేసింది. ఇందుకోసం బడ్జెట్‌లో రూ.2516 కోట్లు ఖర్చు చేయనున్నట్టు కేంద్ర సమాచార ప్రసార శాఖ మంత్రి అనురాగ్ ఠాకూర్‌ వెల్లడించారు. ఈ నిర్ణయం ద్వారా 13కోట్ల మంది రైతులకు, మరీ ముఖ్యంగా చిన్న, సన్నకారు రైతులకు ప్రయోజనం కలగనుందన్నారు. బుధవారం జరిగిన కేంద్ర కేబినెట్‌ సమావేశంలో తీసుకున్న నిర్ణయాలను ఆయన మీడియాకు వివరించారు. ఈ ప్రాజెక్టులో భాగంగా  సైబర్‌ సెక్యూరిటీ, డేటా స్టోరేజీతో పాటు క్లౌడ్‌ ఆధారిత కామన్‌ సాఫ్ట్‌వేర్‌ను అభివృద్ధి చేయడం, పీఏసీఎస్‌లకు హార్డ్‌వేర్‌ సపోర్టు కల్పిస్తామని, ప్రస్తుతం ఉన్న రికార్డులను డిజిటలైజ్‌ చేస్తామని తెలిపారు. దేశీయంగా ఉత్పత్తి అయ్యే ముడి చమురు విక్రయాలపై నియంత్రణలో సడలింపులు ఇచ్చేందుకు మంత్రివర్గం ఆమోదం తెలిపింది. అన్ని చమురు అన్వేషణ సంస్థలకు, ఉత్పత్తి సంస్థలకు మార్కెటింగ్ స్వేచ్ఛను కల్పించాలని తాజాగా నిర్ణయించింది.