credit guarantee: ఈసీఎల్‌జీఎస్‌ వర్తింపు విస్తరణ!

ఇంటర్నెట్‌డెస్క్‌: కరోనా సెకండ్‌ వేవ్‌లో వ్యాపారాలు దెబ్బతినడంతో రుణాలను చెల్లించలేని సంస్థలకు ఊరటనిచ్చే విషయాన్ని ప్రభుత్వం చెప్పింది. ది ఎమర్జెన్సీ క్రెడిట్‌ లైన్‌ గ్యారెంటీ స్కీం (ఈసీఎల్‌జీఎస్‌)ను విస్తరించింది. దీనిని ఈసీఎల్‌జీఎస్‌ 4.0గా వ్యవహరిస్తున్నారు. ఇప్పటికే ఈ పథకం ప్రవేశపెట్టిన దగ్గర నుంచి నాలుగు సార్లు విస్తరించారు. ఈ పథకంలో ఉన్న రూ.500 కోట్ల రుణ పరిమితిని కూడా ఈ సారి తొలగించింది.  వారికి ఉన్న రుణంలో 40శాతం గానీ, లేదా రూ.200 కోట్లు కానీ అదనంగా తీసుకోవచ్చు. ఈసీఎల్‌జీఎస్‌ 1.0లో అర్హులు మరో 10శాతం అదనంగా రుణం తీసుకొనే అవకాశం కల్పించింది. 

తాజాగా చేసిన మార్పుల ప్రకారం ఈ పథకం కింద ఆసుపత్రులు, నర్సింగ్‌ హోమ్‌లలో ఆక్సిజన్‌ ప్లాంట్ల ఏర్పాటుకు, ఎంఎస్‌ఎంఈ ఖాతాల రీస్ట్రక్చరింగ్‌కు, పౌర విమానయాన శాఖ వంటి రంగాలకు వర్తింపజేస్తోంది. ఈ స్కీం తుదిగడువును సెప్టెంబర్‌ 30 నుంచి డిసెంబర్‌ 31కు పొడిగించింది.  ఆసుపత్రులు ఆక్సిజన్‌ ప్లాంట్ల ఏర్పాటుకు తీసుకొనే రూ.2 కోట్ల వరకు రుణాలకు ఇది వర్తిస్తుంది. వీటిపై వడ్డీ 7.5 శాతానికి మించదు.  

‘‘ఈసీఎల్‌జీఎస్‌లో మార్పులు చేయడంతో ఈ పథకం ప్రయోజనం, ప్రభావం మరింత పెరిగింది. ఎంఎస్‌ఎంఈలు ఆర్థికంగా నిలదొక్కుకొని మరింత మందికి జీవనోపాధి కల్పించేందుకు ఉపయోగపడుతుంది. ఈ మార్పులతో సహేతుకమైన నిబంధనలతో రుణాలు లభిస్తాయి’’ అని ఆర్థికశాఖ ఒక ప్రకటనలో పేర్కొంది.