Rooftop solar: ఇంటి పైకప్పు సోలార్‌ యూనిట్‌ సబ్సిడీ 2026 వరకు పొడిగింపు

దిల్లీ: ఇంటి పైకప్పు మీద సౌర విద్యుత్తు పలకల యూనిట్‌ను (రూఫ్‌ టాప్‌ సోలార్‌ ప్యానెల్‌- Rooftop Solar) ఏర్పాటుకు సంబంధించిన రాయితీ గడువును 2026 మార్చి 31 వరకు పొడిగిస్తున్నట్లు కేంద్రం వెల్లడించింది. అప్పటివరకు సోలార్‌ ఇన్‌స్టాలేషన్ కోసం ఎలాంటి అదనపు ఛార్జీలూ చెల్లించాల్సిన అవసరం లేదని వినియోగదారులకు సూచించింది. ఈ పథకం లక్ష్యం నెరవేరేంత వరకు రాయితీ కొనసాగుతుందని పునరుత్పాదక ఇంధన మంత్రిత్వ శాఖ ఓ ప్రకటనలో తెలిపింది.

నేషనల్‌ పోర్టల్‌లో దరఖాస్తు రుసుము లేదా సంబంధిత పంపిణీ సంస్థ సూచించని నెట్-మీటరింగ్/టెస్టింగ్ కోసం అదనపు ఛార్జీల ఎవరైనా కోరితే చెల్లించొద్దని వినియోగదారులకు మంత్రిత్వ శాఖ సూచించింది. అలాంటి ఛార్జీల కోసం వెండర్లు/ ఏజెన్సీలు/ వ్యక్తులు ఎవరైనా డిమాండ్‌ చేస్తే rts-mnre@gov.in ద్వారా మంత్రిత్వ శాఖకు ఫిర్యాదు చేయాలని తెలిపింది. రూఫ్‌టాప్ సోలార్ ప్యానెల్‌లను ఇన్‌స్టాల్ చేయాలనుకునే వినియోగదారులు నేషనల్ పోర్టల్‌లో దరఖాస్తు చేసుకోవచ్చని, ప్రక్రియను ఎప్పటికప్పుడు ట్రాక్ చేయవచ్చని తెలిపింది. ఒక కిలోవాట్‌కు (kW) రూ.14,588 చొప్పున 3 కిలోవాట్ల వరకు రాయితీ ఇస్తారు. రూఫ్‌ టాప్‌ సోలార్‌ కోసం ఈ ఏడాది జులైలో ప్రధాని మోదీ ప్రత్యేకంగా ఓ పోర్టల్‌ను ప్రారంభించారు.