Websites Block: 67 అశ్లీల వెబ్‌సైట్‌లపై కేంద్రం వేటు!

దిల్లీ: అంతర్జాలంలో అశ్లీల వెబ్‌సైట్‌(Websites)లపై కేంద్ర ప్రభుత్వం కొరడా ఝుళిపించింది. 67 వెబ్‌సైట్‌లను తక్షణమే బ్లాక్ చేయాలని ఇంటర్నెట్ కంపెనీలను ఆదేశించింది. 2021లో జారీ చేసిన కొత్త ఐటీ నిబంధనల(IT Rules 2021)కు అనుగుణంగా, కోర్టు ఆదేశాలను అనుసరించి ఈ చర్యలు తీసుకోవాలని సూచించింది. టెలికాం విభాగం(DoT).. ఈ మేరకు ఇంటర్నెట్ సర్వీస్ ప్రొవైడర్ల(ISP)కు ఈ-మెయిల్‌ పంపింది. ఎలక్ట్రానిక్స్, ఐటీ మంత్రిత్వ శాఖ(MeitY) మార్గదర్శకాలతోపాటు పుణె కోర్టు ఆదేశాల ఆధారంగా 63 వెబ్‌సైట్‌లను, ఉత్తరాఖండ్ హైకోర్టు ఆదేశాల ఆధారంగా నాలుగు.. మొత్తం 67 వెబ్‌సైట్‌లను బ్లాక్ చేయాలని స్పష్టం చేసింది. ‘సంబంధిత వెబ్‌సైట్‌లలోని అశ్లీలత.. మహిళల గౌరవానికి భంగం కలిగిస్తోందన్న విషయాన్ని దృష్టిలో ఉంచుకుని, ఐటీ నిబంధనలతోపాటు కోర్టుల ఉత్తర్వులకు అనుగుణంగా.. వెంటనే వాటిని బ్లాక్‌ చేయాలని మంత్రిత్వ శాఖ ఆదేశించింది’ అని టెలికాం విభాగం తన ఉత్తర్వుల్లో పేర్కొంది.