ఉద్యమాన్ని అణచివేసేందుకే ఈ నిశ్శబ్దం

ప్రభుత్వంపై మండిపడ్డ రైతు నాయకుడు రాకేశ్ టికాయిత్‌

లక్నో: శాంతియుతంగా రైతులు చేసే ఉద్యమాన్ని అణచివేసేందుకే గత కొన్ని వారాలుగా ప్రభుత్వం నిశ్శబ్దంగా ఉందని భారతీయ కిసాన్‌ యూనియన్‌ నాయకుడు రాకేశ్‌ టికాయిత్‌ ఆరోపించారు. ప్రభుత్వం ఇప్పటి వరకూ తమను మరోసారి చర్చలకు ఆహ్వానించలేదని ఆయన మండిపడ్డారు. ‘‘ ప్రభుత్వం గత 20 రోజులుగా నిశ్శబ్దంగా ఉంది. ఏదో జరగబోతోందని అనిపిస్తోంది. మా ఉద్యమానికి వ్యతిరేకంగా ప్రభుత్వం చర్యలు తీసుకుంటుందనిపిస్తోంది.’’ అని ఆయన అన్నారు. ఏదేమైనా సమస్యకు పరిష్కారం దొరికే వరకూ తాము వెనక్కి తగ్గబోమని ఆయన పేర్కొన్నారు. మార్చి 24 వరకు దేశవ్యాప్తంగా మహా పంచాయత్‌లు కొనసాగిస్తామని వెల్లడించారు.
కొన్ని ప్రాంతాల్లో రైతులు పంటలను తగులబెట్టడంపై ఆయన స్పందిస్తూ.. ఆ చర్యలకు ఇంకా సమయముందన్నారు. కేంద్రంపై నిరసన వ్యక్తం చేస్తూ చాలా ప్రాంతాల్లో రైతులు పంటలను తగులబెడుతున్నా వారు ఇప్పటి వరకూ స్పందించలేదన్నారు. గణతంత్ర దినోత్సవం రోజు దిల్లీలో జరిగిన ఘర్షణలకు ప్రభుత్వమే కారణమని ఆయన ఆరోపించారు.