Monkeypox: కేంద్రం అప్రమత్తం.. ‘మంకీపాక్స్‌’ కట్టడికి ప్రత్యేక టాస్క్‌ఫోర్స్ ఏర్పాటు

దిల్లీ: దేశంలో మంకీపాక్స్‌(Monkeypox) కేసుల పర్యవేక్షణ, కట్టడి కోసం ప్రభుత్వానికి దిశానిర్దేశం చేసేందుకు కేంద్ర ఆరోగ్య శాఖ(Health Ministry) ప్రత్యేక టాస్క్‌ఫోర్స్‌(Special Task Force)ను ఏర్పాటు చేసింది. నీతి ఆయోగ్(NITI Aayog) సభ్యుడు వీకే పాల్ (VK Paul) ఈ టాస్క్‌ఫోర్స్‌కు నేతృత్వం వహిస్తారని అధికార వర్గాలు వెల్లడించాయి. ఇందులో ఆరోగ్యశాఖ అధికారులతోపాటు దేశంలోని ప్రధాన వైద్య, పరిశోధనా సంస్థల ప్రతినిధులూ సభ్యులుగా ఉంటారని తెలిపాయి. వైరస్‌ నిర్ధారణ, చికిత్సలకు సంబంధించి వసతుల విస్తరణ, అవసరమైన ఏర్పాట్లు, వ్యాక్సిన్‌ తయారీ తదితర అంశాలపై ఈ టాస్క్‌ఫోర్స్‌ సూచనలు చేస్తుంది. ఇటీవల నిర్వహించిన ఓ ఉన్నత స్థాయి సమావేశంలో కేంద్రీకృత టాస్క్‌ఫోర్స్‌ ఏర్పాటుకు నిర్ణయం తీసుకున్నట్లు అధికారులు వెల్లడించిన విషయం తెలిసిందే.

‘దేశంలో మంకీపాక్స్ కేసుల నిర్వహణలో ఈ టాస్క్‌ఫోర్స్‌ సహాయపడుతుంది. ఆయా రాష్ట్రాల్లో నమోదయ్యే కేసులను సమన్వయం చేస్తుంది. అవసరమైతే సూచనలు జారీ చేస్తుంది’ అని ఓ సీనియర్‌ అధికారి తెలిపారు. ఇదిలా ఉండగా భారత్‌లో ఇప్పటి వరకు నాలుగు మంకీపాక్స్‌ కేసులు నమోదయ్యాయి. ఇందులో మూడు కేరళలో కాగా.. మరొకటి దిల్లీలో వెలుగుచూసింది. ఈ క్రమంలోనే కేరళలో మంకీపాక్స్‌ లక్షణాలతో ఓ 22 ఏళ్ల యువకుడు మృతి చెందాడు. అతని నమూనాలను పరీక్షలకు పంపగా.. మంకీపాక్స్‌ పాజిటివ్‌గా నిర్ధారణ అయినట్లు రాష్ట్ర ఆరోగ్యశాఖ మంత్రి వీణా జార్జి సోమవారం వెల్లడించారు. అయితే, భారత్‌కు వచ్చేముందే యూఏఈలో అతనికి మంకీపాక్స్ పాజిటివ్‌గా తేలగా, ఇక్కడికి వచ్చిన తర్వాత ఈ విషయాన్ని వైద్యుల వద్ద దాచిపెట్టినట్లు అతని సన్నిహిత వర్గాలు పేర్కొంటున్నాయి.