G20 agri meet: దిగుమతి నుంచి ఎగుమతుల దేశంగా ఎదిగాం

ఇంటర్నెట్‌ డెస్క్‌: వాతావరణ మార్పుల సవాళ్లను ఎదుర్కోవడంతోపాటు 2030 నాటికి ఏర్పడే ఆహార డిమాండ్‌ను అందుకునేందుకు.. వ్యవసాయ రంగ పరిశోధన, అభివృద్ధిలో పెట్టుబడులను పెంచాల్సిన అవసరం ఉందని భారత్‌ అభిప్రాయపడింది. అక్టోబరులో ఇటలీలో జరగనున్న జీ-20 శిఖరాగ్ర సమావేశంలో భాగంగా శనివారం ముందస్తుగా నిర్వహించిన జీ-20 వ్యవసాయ మంత్రుల సమావేశంలో కేంద్ర వ్యవసాయశాఖ మంత్రి నరేంద్ర సింగ్‌ తోమర్‌ పాల్గొన్నారు. ‘రీసెర్చ్‌ యాజ్‌ ఏ డ్రైవింగ్‌ ఫోర్స్‌ బిహైండ్‌ సస్టెయినబిలిటీ’ అంశంపై ఆయన ప్రసంగించారు. ఆహార ధాన్యాలను దిగుమతి చేసుకునే దేశం నుంచి ఎగుమతి చేసే దేశంగా భారత్‌ ఎదిగిందని, ఈ క్రమంలో వ్యవసాయ పరిశోధన కీలక పాత్ర పోషించిందని పేర్కొన్నారు. ప్రస్తుతం వార్షికంగా 308 మిలియన్ టన్నుల ఆహార ధాన్యాల ఉత్పత్తితో ఆహార భద్రతను సాధించడంతోపాటు ఇతర దేశాల అవసరాలనూ తీర్చుతున్నామన్నారు.

రైతుల ఆదాయం పెంచే దిశగా చర్యలు

‘భారత్‌ జనాభా 2030-32 నాటికి 150 కోట్లకు పెరిగే అవకాశం ఉన్న నేపథ్యంలో.. ఆహార ధాన్యాల డిమాండ్ కూడా 350 మిలియన్ టన్నులకు చేరుతుందని భావిస్తున్నాం. కానీ.. తరిగిపోతున్న సహజ వనరులు, వాతావరణ మార్పుల కారణంగా ఈ డిమాండ్‌ మరింత పెరిగే అవకాశం ఉంది. ఈ క్రమంలో ఆహార స్వావలంబన సాధించే దిశగా డిజిటల్ వ్యవసాయం, సేద్య పరికరాలు, పర్యావరణ హిత పంట రకాల అభివృద్ధి, నాణ్యత తదితర అంశాల్లో తమ పరిశోధనలు కొనసాగుతాయ’ని చెప్పారు. ఈ చర్యలన్నీ పంట ఉత్పాదకతతోపాటు రైతుల ఆదాయాన్ని పెంచే దిశగా ఉంటాయని వివరించారు. ఆహార భద్రత, పోషకాహారం, వ్యవసాయ అభివృద్ధి తదితర అంశాలపై చర్చించేందుకు 2011లో పారిస్‌లో మొదటి జీ-20 వ్యవసాయ మంత్రుల సమావేశం నిర్వహించారు. 2015 నుంచి ఏటా కొనసాగిస్తున్నారు.