Himanta Biswa Sarma: ప్రధాని అమిత్‌ షా అట.. సాక్షాత్తు ముఖ్యమంత్రే పొరబడ్డారు..!

తదుపరి ప్రధానిని నిర్ణయించారా..?: కాంగ్రెస్

గువహటి: ప్రధాని అమిత్‌ షా, హోం మంత్రి నరేంద్రమోదీ.. ఇలా దేశంలో అత్యున్నత స్థాయి వ్యక్తుల పదవుల్ని తప్పుగా ప్రస్తావించారు అస్సాం ముఖ్యమంత్రి హిమంత బిశ్వశర్మ. ఓ బహిరంగ కార్యక్రమంలో మాట్లాడుతూ ఆయనిలా పొరబడ్డారు. ఆయన మాటలిప్పుడు వైరల్‌గా మారగా.. దానికి సంబంధించిన వీడియోను కాంగ్రెస్‌ ట్విటర్‌లో షేర్ చేసి, చురకలు అంటిస్తోంది.

ఇటీవల జరిగిన ఓ కార్యక్రమంలో ప్రజలనుద్దేశించి ప్రసంగిస్తూ.. ప్రధాని అమిత్‌ షా, హోం మంత్రి నరేంద్రమోదీ అంటూ హిమంత బిశ్వ ప్రస్తావించారు. అధికార పార్టీ కొత్త ప్రధానిని ఎంచుకుందా ఏంటి..? అంటూ కాంగ్రెస్ తన విమర్శలకు పదునుపెట్టింది. అలాగే గతంలో జరిగిన ఈ తరహా సంఘటనతో పోల్చి చూపింది. ఆ సమయంలో సర్బానంద్ సోనోవాల్ ముఖ్యమంత్రి కాగా.. ఓ ఎంపీ మాట్లాడుతూ, హిమంత బిశ్వ శర్మను ముఖ్యమంత్రి అంటూ ప్రస్తావించారు. అలా పలుమార్లు జరిగింది కూడా. వాస్తవంగా అప్పుడు హిమంత అస్సాం మంత్రిగా ఉన్నారు. ఆ తర్వాత జరిగిన అసెంబ్లీ ఎన్నికల్లో భాజపా గెలవడంతో హిమంత ముఖ్యమంత్రి పదవిని చేపట్టారు. దీనిని ఉదహరిస్తూ.. ‘భాజపా తన తదుపరి ప్రధానిని నిర్ణయించుకుందా..?’ అంటూ హస్తం పార్టీ వ్యాఖ్యలు చేసింది. ఇది కేవలం పొరపాటేనని భాజపా నేతలు అంటున్నారు. గతంలో ఆ ఎంపీ అన్నదాన్నిబట్టి చూస్తే.. ఇది పొరపాటుగా అనిపించడం లేదని కాంగ్రెస్ నేతలు కౌంటర్ ఇచ్చారు.