IAF: కుప్పకూలిన వాయుసేన విమానం

ఇంటర్నెట్‌డెస్క్‌: వాయుసేనకు చెందిన మిరాజ్‌ 2000 ఫైటర్‌ జెట్‌ విమానం నేడు కుప్పకూలింది. మధ్యప్రదేశ్‌లోని భింద్‌ జిల్లాలో ఈ ఘటన చోటుచేసుకుంది. ఈ ప్రమాదం నుంచి పైలట్‌ సురక్షితంగా బయటపడినట్లు వాయుసేన పేర్కొంది. భింద్‌కు ఆరు కిలోమీటర్ల దూరంలోని మనకాబాద్‌ వద్ద ఖాళీ ప్రదేశంలో విమానం కూలినట్లు తెలుస్తోంది.  

శిక్షణలో భాగంగా ఈ విమానం ఉదయం సెంట్రల్‌ సెక్టార్‌ నుంచి గాల్లోకి ఎగిరింది. అనంతరం ప్రమాదానికి గురైంది. 
ప్రమాదం జరిగిన ప్రదేశాన్ని పోలీసులు ఆధీనంలోకి తీసుకున్నారు. ఘటనా స్థలిలో విమానం తోక భాగం నేలలో కూరుకుపోయి కనిపిస్తోంది. సాంకేతిక కారణాల వల్ల ఈ ప్రమాదం జరిగినట్లు వాయుసేన భావిస్తోంది. ఈ ప్రమాదానికి కారణాలను అన్వేషించేందుకు దర్యాప్తు ప్రారంభించింది.