సీఎం వేదికపైకి ఏడాది బిడ్డను విసిరేసి.. ఆ తండ్రి ప్రవర్తన వెనక అంతులేని వేదన..!

భోపాల్: సీఎం దృష్టిలో పడేందుకు ఓ తండ్రి చేసిన చర్య అందరినీ అవాక్కయ్యేలా చేసింది. ఏడాది బిడ్డను వేదికపైకి విసరడం ఒక్కసారిగా చర్చనీయాంశమైంది. అయితే ఆ కన్నతండ్రి ప్రవర్తన వెనక కారణం తెలిస్తే మాత్రం హృదయం చలించకమానదు..! అసలు ఏం జరిగిందంటే..? (Man throws his year-old child)

మధ్యప్రదేశ్‌(Madhya Pradesh)కు చెందిన ముకేశ్‌ పటేల్‌, నేహా భార్యభర్తలు. ముకేశ్‌ రోజువారీ కూలీ. ఆ జంటకు ఏడాది వయస్సున్న కుమారుడు ఉన్నాడు. ఆ చిన్నారికి మూడు నెలల వయస్సున్నప్పుడు గుండెలో రంధ్రం ఉందని వైద్యులు గుర్తించారు. అప్పటినుంచి వైద్యం కోసం రూ.4లక్షల వరకు ఖర్చు చేశారు. ఇప్పటికే ముకేశ్ కుటుంబం స్థోమతకు మించి ఖర్చు చేసింది. ఇక ఆపరేషన్‌కు రూ.3.50లక్షలు కావాలి. ఆ డబ్బు ఎలా సమకూర్చుకోవాలో వారికి అర్థం కాలేదు. తమ గోడు ఎవరికి వినిపించాలో తెలీక సతమతమయ్యారు. 

అప్పుడే ముఖ్యమంత్రి శివరాజ్‌ సింగ్ చౌహాన్‌(Shivraj Singh Chouhan).. సాగర్ ప్రాంతంలో జరిగిన ఓ కార్యక్రమంలో పాల్గొన్నారు. అక్కడికి ముకేశ్‌, నేహా కూడా వెళ్లారు. తమ సమస్యను ఎలాగైనా సీఎం దృష్టికి తీసుకెళ్లాలని యత్నించారు. కానీ ముఖ్యమంత్రి దగ్గరకు వెళ్లడం వారికి సాధ్యపడలేదు. దాంతో తీవ్ర ఆవేదనకు గురైన ఆ తండ్రి విపరీత చర్యకు పాల్పడ్డారు. వేదికపై సీఎం ప్రసంగిస్తోన్న సమయంలో ఒక్కసారిగా బిడ్డను అక్కడకు విసిరేశాడు. ఆ చర్యతో అక్కడున్నవారు ఉలిక్కిపడ్డారు. వెంటనే తేరుకున్న భద్రతా సిబ్బంది ఆ పిల్లాడిని కాపాడి, తల్లికి అప్పగించారు. అసలు అతడి ప్రవర్తనకు గల కారణం గురించి సీఎం అడిగి తెలుసుకున్నారు. చిన్నారి సమస్య తెలుసుకున్న సీఎం.. వైద్య సహాయం అందిస్తానని హామీ ఇచ్చారు. ఆ వెంటనే స్థానిక కలెక్టర్‌కు ఆదేశాలు జారీ చేశారు. అయితే, తండ్రి చేసిన ఈ విపరీత చర్య పట్ల సర్వత్ర విమర్శలు వెల్లువెత్తుతున్నాయి. సహాయం అర్థించే పద్ధతి ఇది కాదని అంటున్నారు.