India Corona : కొత్తగా 2.34 లక్షల కేసులు.. 3.52 లక్షల రికవరీలు

స్వల్పంగా పెరిగిన పాజిటివిటీ రేటు..

దిల్లీ : దేశంలో కరోనా ఉద్ధృతి స్థిరంగా కొనసాగుతోంది. గత కొన్ని రోజులుగా కేసులు 2 లక్షలకుపైనే నమోదవుతున్నాయి. మరోవైపు మరణాలు భారీగానే ఉండటం ఆందోళన కలిగిస్తోంది. అయితే కొత్త కేసుల కంటే రికవరీలే ఎక్కువగా ఉండటం సానుకూలాంశం. కేంద్ర ఆరోగ్య శాఖ విడుదల చేసిన గణాంకాల ప్రకారం..

¬ గడిచిన 24 గంటల్లో 16,15,993 నిర్ధారణ పరీక్షలు నిర్వహించగా.. 2,34,281 కేసులు వెలుగులోకి వచ్చాయి. ఇందులో ఒక్క కేరళ రాష్ట్రంలో నమోదైన కేసులే 50,812గా ఉన్నాయి. మరోవైపు మహారాష్ట్రలో కేసులు క్రమంగా తగ్గుతున్నాయి. నిన్న ఆ రాష్ట్రంలో 27,971 కేసులు వెలుగులోకి వచ్చాయి. ఇక దేశంలో రోజువారీ పాజిటివిటీ రేటు 13.39% నుంచి 14.50%కి పెరిగింది. 

¬ నిన్న ఒక్క రోజే 893 మరణాలు చోటుచేసుకున్నాయి. దీంతో ఇప్పటి వరకూ ప్రాణాలు కోల్పోయిన వారి సంఖ్య 4,94,091కి చేరింది.

¬ గడిచిన 24 గంటల్లో 3,52,784 మంది కరోనా నుంచి కోలుకోగా.. ఇప్పటి వరకూ వైరస్‌ను జయించిన వారి సంఖ్య 3.87 కోట్లకు చేరింది. దీంతో రికవరీ రేటు 94.21% శాతానికి చేరింది.

¬ ప్రస్తుతం క్రియాశీల కేసుల సంఖ్య 18,84,937కి చేరి.. ఆ రేటు 4.59 శాతంగా కొనసాగుతోంది.

¬ మరోవైపు దేశవ్యాప్తంగా వ్యాక్సినేషన్‌ వేగంగా కొనసాగుతోంది. నిన్న 62,22,682 మంది టీకాలు వేయించుకోగా.. ఇప్పటి వరకూ పంపిణీ చేసిన డోసుల సంఖ్య 165 కోట్లు దాటింది.