​​​​​కొత్త కేసుల తగ్గుదలకు బ్రేక్‌!

24 గంటల్లో 54,044 కేసులు.. 717 మరణాలు

దిల్లీ: దేశంలో కొత్తగా నమోదయ్యే కరోనా కేసులు తగ్గే పరంపరకు బ్రేక్ పడింది. గత 24 గంటల్లో దేశంలో 54,044 కొత్త కేసులు వచ్చాయి. నిన్న 46,790 కేసులు వెలుగు చూసిన విషయం తెలిసిందే. మరణాల సంఖ్య కూడా పెరగడం గమనార్హం. తాజాగా 717 మంది వైరస్‌ సోకి మృత్యువాతపడ్డారు. గత రెండురోజులు వరుసగా మరణాలు 600లోపునకే పరిమితమయ్యాయి. ప్రస్తుతం క్రియాశీల కేసులు 9.67 శాతంగా ఉన్నాయి. తాజా లెక్కల ప్రకారం రికవరీ రేటు 88.81శాతంగా ఉంది. మరణాలు రేటు 1.51 శాతానికి చేరింది. మంగళవారం కొత్తగా 10,83,608 నమూనాల్ని పరీక్షించారు. నిర్ధారణ పరీక్షల సంఖ్య పెంచడమే కేసుల పెరుగుదలకు కారణంగా తెలుస్తోంది.

కరోనా కేసుల సంఖ్య మొత్తంగా 76,51,108కు చేరింది. వివిధ కొవిడ్‌ ఆసుపత్రుల్లో 7,40,090 మంది చికిత్స పొందుతుండగా.. ఇప్పటివరకు 67,95,103 మంది కోలుకొని డిశ్ఛార్జి అయ్యారు. కరోనాతో ఇప్పటి వరకు 1,15,914 మంది ప్రాణాలు కోల్పోయారు.