India Corona: కొత్త కేసులు.. 6 వేలకు దిగొచ్చాయి..!

లక్ష దిగువకు క్రియాశీల కేసులు

దిల్లీ: దేశంలో కరోనా కేసులు రోజురోజుకూ భారీగా తగ్గుతున్నాయి. ఇటీవల 10 వేల దిగువకు చేరిన కొత్త కేసులు.. తాజాగా 6 వేలకు దిగొచ్చాయి. మృతుల సంఖ్య అదుపులోనే ఉంది. మంగళవారం కేంద్ర ఆరోగ్య శాఖ ఈ సానుకూల గణాంకాలను వెల్లడించింది. 

* సోమవారం 9 లక్షల మందికి కరోనా నిర్ధారణ పరీక్షలు నిర్వహించగా..6,915 మందికి వైరస్ సోకినట్లు తేలింది. కొత్త కేసులు డిసెంబర్ చివరినాటి స్థాయికి చేరాయి. పాజిటివిటీ రేటు ఒక శాతం దిగువకు పడిపోయింది. ఇక ఇప్పటివరకు 4.29 కోట్ల మందికి కరోనా సోకింది.

* 24 గంటల వ్యవధిలో 180 మంది ప్రాణాలు కోల్పోయారు. ముందురోజు ఆ సంఖ్య 120 దిగువన ఉంది. ఇప్పటివరకు 5,14,023 మంది మృత్యుఒడికి చేరుకున్నారు. 

* కొవిడ్ వ్యాప్తి అదుపులో ఉండటంతో బాధితుల సంఖ్య లక్ష లోపునకు చేరింది.  దాంతో క్రియాశీల కేసుల రేటు 0.22 శాతానికి తగ్గిపోయింది.

* నిన్న 16,864 మంది కొవిడ్ నుంచి కోలుకున్నారు. మొత్తం రికవరీలు 4.23 కోట్లు దాటాయి. రికవరీ రేటు 98.59 శాతానికి పెరిగింది. 

* మరోపక్క 18 లక్షల మంది టీకా తీసుకున్నారు. ఇప్పటివరకు 177 కోట్లకుపైగా డోసులు పంపిణీ అయ్యాయి.