India Corona: కాస్త తగ్గిన కొత్త కేసులు..!

దిల్లీ: దేశంలో కరోనా వైరస్ వ్యాప్తి కొనసాగుతోంది. గత కొన్ని రోజులుగా 12 వేలకుపైగానే నమోదైన కొత్త కేసులు.. 10వేల దిగువకు చేరాయి.. పలు రాష్ట్రాల్లో వైరస్‌ విస్తరిస్తుండటంతో క్రియాశీల కేసులు 79 వేలపైకి ఎగబాకాయి. మంగళవారం కేంద్ర ఆరోగ్య శాఖ వెల్లడించిన గణాంకాల ప్రకారం.. 

* సోమవారం 3.88 లక్షల మందికి కొవిడ్ నిర్ధారణ పరీక్షలు నిర్వహించగా.. 9,923 మందికి వైరస్ పాజిటివ్‌గా తేలింది. ప్రస్తుతం పాజిటివిటీ రేటు 2.55 శాతానికి చేరింది. మహారాష్ట్ర, కేరళలో రెండు వేలకు పైగా కేసులు నమోదుకాగా, దిల్లీలో వెయ్యిమందికి పైగా కరోనా బారినపడ్డారు. ఇప్పటివరకూ దేశంలో 4.33 కోట్లకు పైగా కేసులొచ్చాయి. 

* ఇటీవల కాలంలో కరోనా ఇన్ఫెక్షన్ విస్తరిస్తుండటంతో క్రియాశీల కేసులు భారీగా పెరుగుతున్నాయి. ప్రస్తుతం వాటి సంఖ్య 79,313కి చేరింది. క్రియాశీల రేటు 0.18 శాతంగా ఉండగా.. రికవరీ రేటు 98.61 శాతానికి పడిపోయింది. నిన్న 7,293 మంది కోలుకోగా.. 17 మంది మరణించారు. మొత్తంగా 4.27 కోట్ల మందికి పైగా వైరస్‌ను జయించగా, 5.24 లక్షల మందికి పైగా మహమ్మారికి బలయ్యారు. 

* ఇక నిన్న 13 లక్షల మందికి పైగా టీకా తీసుకోగా.. 196 కోట్లకు పైగా డోసులు పంపిణీ అయ్యాయని కేంద్రం వెల్లడించింది.