Corona Vaccination: 192 కోట్ల టీకాల పంపిణీ.. మరో అరుదైన రికార్డుకు చేరువలో

దిల్లీ: కరోనా వ్యాప్తిని అదుపులోకి తెచ్చి.. కోట్లాది మంది ప్రాణాలను కాపాడుతోన్న బృహత్తర టీకా పంపిణీ కార్యక్రమంలో భారత్‌ మరో అరుదైన రికార్డుకు చేరువలో ఉంది. 2021 జనవరి 16న వ్యాక్సినేషన్‌ ప్రక్రియను ప్రారంభించగా.. ఇప్పటి వరకు 191.96కోట్ల డోసులు పంపిణీ అయ్యాయి. త్వరలోనే 200 కోట్ల డోసుల మైలురాయిని చేరుకోనుంది.

కట్టడిలోనే కరోనా వ్యాప్తి..

కరోనా మహమ్మారి కట్టడిలోనే ఉంది. స్వల్ప హెచ్చు తగ్గుదలతో కొత్త కేసులు 3వేల దిగువనే ఉంటున్నాయి. గురువారం దేశవ్యాప్తంగా 4.51లక్షల మందికి వైరస్‌ నిర్ధారణ పరీక్షలు నిర్వహించగా.. 2,259 మందికి పాజిటివ్‌గా తేలింది. క్రితం రోజు(2,364)తో పోలిస్తే కేసులు కాస్త తగ్గాయి. రోజువారీ పాజిటివిటీ రేటు ఒక శాతానికి(0.53శాతం) దిగువనే ఉంది.

ఇక కొత్త కేసుల కంటే రికవరీలు అధికంగా ఉండటం ఊరటనిచ్చే అంశం. తాజాగా 24 గంటల వ్యవధిలోనే 2,614 మంది కోలుకోగా.. రికవరీ రేటు 98.75శాతంగా ఉంది. ప్రస్తుతం దేశవ్యాప్తంగా 15,044 మంది వైరస్‌తో బాధపడుతుండగా.. క్రియాశీల కేసుల రేటు 0.03శాతంగా ఉంది. నిన్న మరో 20 మంది వైరస్‌తో ప్రాణాలు కోల్పోయారు. ఇప్పటి వరకు 5.24లక్షల మందిని మహమ్మారి బలి తీసుకుంది.