DGCA: అంతర్జాతీయ విమానాలపై కొనసాగనున్న నిషేధం

దిల్లీ: అంతర్జాతీయ విమాన సర్వీసులపై నిషేధం కొనసాగనుంది. తదుపరి ఆదేశాల వరకు అంతర్జాతీయ విమానాలపై నిషేధం కొనసాగనున్నట్లు డైరెక్టర్‌ జనరల్‌ ఆఫ్‌ సివిల్‌ ఏవియేషన్‌ (డీజీసీఏ) సోమవారం వెల్లడించింది. ‘తదుపరి ఉత్తర్వులు విడుదలయ్యేవరకు షెడ్యూల్ చేయబడిన అంతర్జాతీయ వాణిజ్య ప్రయాణికుల సర్వీసుల సస్పెన్షన్‌ను పొడిగించాలని కాంపిటెంట్ అథారిటీ నిర్ణయించింది’ అని డీజీసీఏ తెలిపింది. కార్గో కార్యకలాపాలు, ప్రత్యేకంగా ఆమోదం పొందిన విమానాలకు ఈ నిబంధనలు వర్తించవు అని పేర్కొంది.

కరోనా వైరస్‌ ఉద్ధృతితో 2020 మార్చి నుంచి అంతర్జాతీయ పాసింజర్‌ విమాన సర్వీసుల్ని భారత్‌ నిలిపివేసిన విషయం తెలిసిందే. అయితే 2020 జులై నుంచి వందే భారత్‌ మిషన్‌ కింద ఎయిర్‌ బబుల్‌ ఏర్పాటు చేసిన కేంద్రం దాదాపు 45 దేశాలకు ప్రత్యేక విమానాలను నడుపుతోంది.