Modi In Japan: భారత్‌-జపాన్‌ సహజ భాగస్వాములు: ప్రధాని మోదీ

టోక్యో: భారత్‌, జపాన్‌ సహజ భాగస్వాములని ప్రధాని నరేంద్ర మోదీ అన్నారు. జపనీయుల పెట్టుబడులు భారతదేశ అభివృద్ధి గమనంలో కీలక పాత్ర పోషిస్తున్నాయని వ్యాఖ్యానించారు. రెండు రోజుల పర్యటన నిమిత్తం జపాన్‌కు వెళ్లిన ప్రధాని.. తొలి రోజు టోక్యోలో ప్రవాస భారతీయులతో నిర్వహించిన ప్రత్యేక కార్యక్రమంలో ప్రసంగించారు. జపాన్‌తో భారత్‌ బంధం ఆధ్యాత్మికమైందని, సహకారంతో కూడుకున్నదన్నారు. ‘‘భారత్, జపాన్‌ సహజ భాగస్వాములు. భారత అభివృద్ధి ప్రయాణంలో జపాన్‌ కీలక పాత్ర పోషిస్తోంది. నేటి ప్రపంచం బుద్ధుడు చూపిన మార్గాన్ని అనుసరించాల్సిన అవసరం ఉంది.  ప్రపంచం ఎదుర్కొంటొన్న హింస, అరాచకం, ఉగ్రవాదం, వాతావరణ మార్పులు.. ఇలాంటి అనేక సవాళ్ల నుంచి మానవాళిని అదే కాపాడుతుంది’’ అని వ్యాఖ్యానించారు.

ఎంత పెద్ద సమస్య వచ్చినా భారత్‌ పరిష్కారాన్ని కనుగొంటోందని.. కరోనా మహమ్మారి సమయంలో అనిశ్చితి పరిస్థితులు నెలకొన్నా మేడిన్‌ ఇండియా వ్యాక్సిన్లు కోట్లాది భారతీయులతో పాటు దాదాపు 100 దేశాలకు సరఫరా చేసిన విషయాన్ని ప్రస్తావించారు. తాను జపాన్‌కు ఎప్పుడు వచ్చినా అందరూ తమ ఆప్యాయత చూపిస్తున్నారని ప్రవాస భారతీయులను ఉద్దేశించి అన్నారు. ‘‘మీలో చాలా మంది ఎన్నో ఏళ్ల క్రితం జపాన్‌ వచ్చి స్థిరపడ్డారు. ఇక్కడి సంస్కృతిని అలవర్చుకున్నారు. అయినప్పటికీ భారతీయ సంస్కృతి, భాషల పట్ల నిబద్ధత పెరుగుతోంది’’ అంటూ మోదీ పేర్కొనగా.. ప్రవాస భారతీయులు  ‘భారత్‌ మాతాకీ జై’ నినాదాలతో ప్రాంగణాన్ని హోరెత్తించారు. మరోవైపు, భారత్‌, అమెరికా, ఆస్ట్రేలియా, జపాన్‌ కలిసి ఏర్పాటు చేసిన క్వాడ్‌ కూటమి సదస్సులో ప్రధాని మోదీ పాల్గొననున్నారు. జపాన్‌ ప్రధాని కిషిదతో, ఆస్ట్రేలియా కొత్త ప్రధాని ఆంటోనీ అల్బనీస్‌తో చర్చలు జరపనున్నారు.