భారత్‌ నుంచి వచ్చేవారిపై అమెరికా ఆంక్షలు

ఇంటర్నెట్‌డెస్క్‌: భారత్‌లో కరోనా కేసులు పెరిగి పోతుండటంతో ముందుజాగ్రత్త చర్యగా అమెరికా ప్రభుత్వం విధించిన ట్రావెల్‌ బ్యాన్‌ నేటి నుంచి అమల్లోకి వచ్చింది. గత శుక్రవారం ఈ మేరకు అమెరికా అధ్యక్షుడు జో బైడెన్‌ ప్రకటించారు. మే 4వ తేదీ నుంచి భారత్‌ నుంచి అమెరికాకు రావడాన్ని నిషేధించారు. కొన్ని విభాగాలకు చెందిన విద్యార్థులు, జర్నలిస్టులు, కొందరు వ్యక్తులకు మాత్రం ఈ నిషేధం నుంచి మినహాయింపు ఇచ్చారు. ఈ మేరకు అమెరికా స్టేట్‌ డిపార్ట్‌మెంట్‌ ప్రకటన జారీ చేసింది. వ్యక్తిగత హోదాలో మినహాయింపు పొందిన వారిలో గ్రీన్‌ కార్డు హోల్డర్లు, భర్త అమెరికాలో ఉండగా.. ఇంకా పౌరసత్వం పొందని భార్యలు, వారి 21 ఏళ్లలోపు సంతానానికి మినహాయింపు ఇచ్చారు.

ఇక ఈ ట్రావెల్‌ బ్యాన్‌ ఎన్నాళ్లు అమల్లో ఉంటుందన్న విషయాన్ని మాత్రం వెల్లడించలేదు. దీంతో మరోసారి అధ్యక్ష ప్రకటన వెలువడే వరకూ ఇది అమల్లో ఉంటుందని భావిస్తున్నారు. సెంటర్స్‌ ఫర్‌ డిసీజ్‌ కంట్రోల్‌ అండ్‌ ప్రివెన్షన్‌ సిఫార్సుల మేరకు బైడెన్‌ ఈ నిర్ణయం తీసుకొన్నారు.  నిషేధ ప్రకటన సందర్భంగా బైడెన్‌ మాట్లాడుతూ ‘‘ప్రపంచ ఆరోగ్య సంస్థ నివేదిక ప్రకారం భారత్‌లో 1.83కోట్ల కేసులు నమోదయ్యాయి.. ఇవి మరింత వేగంగా పెరుగుతున్నాయి’’ అని వ్యాఖ్యానించారు.  ఈ ప్రకటన అనంతరం అమెరికా విదేశాంగశాఖ మంత్రి ఆంటోని బ్లింకన్‌ మాట్లాడుతూ కొన్ని వర్గాలకు మినహాయింపులు ఇచ్చిన విషయాన్ని వెల్లడించారు.