India-UK: భారత్‌-యూకే వాణిజ్య ఒప్పందం సరైన దిశలోనే..!

దిల్లీ: యూకేలో నివసించిన భారతీయులను ఉద్దేశిస్తూ బ్రిటన్‌ మాజీ మంత్రి సుయెలా బ్రేవర్మన్‌ వ్యాఖ్యలు ఇటీవల తీవ్ర దుమారానికి తీశాయి. దీంతో ఇరు దేశాల మధ్య స్వేచ్ఛా వాణిజ్య ఒప్పందం (ఎఫ్‌టీఏ)పై సందిగ్ధత నెలకొంది. అయితే ఈ ఒప్పందంపై చర్చలు సరైన దిశలోనే సాగుతున్నాయని భారత వాణిజ్య శాఖ కార్యదర్శి సునిల్‌ బర్త్వాల్‌ తాజాగా వెల్లడించారు.

‘‘స్వేచ్ఛా వాణిజ్య ఒప్పందంలో అనేక అంశాలపై ఇప్పటికే ఏకాభిప్రాయం కుదిరింది. ఇంకా కొన్నింటిపై నిర్ణయం తీసుకోవాల్సి ఉంది. ప్రస్తుతం చర్చలు జరుగుతున్నాయి. సరైన దిశలోనే ముందుకెళ్తున్నాం. అతిత్వరలోనే రెండు దేశాల మధ్య ఈ ఒప్పందం జరుగుతుందని ఆశిస్తున్నాం’’ అని సునిల్‌ మీడియాకు తెలిపారు.

ద్వైపాక్షిక వాణిజ్యం, ఆర్థిక సంబంధాలను మరింత బలోపేతం చేసుకునేందుకు వీలుగా ‘స్వేచ్ఛా వాణిజ్య ఒప్పందం’పై భారత్‌, యూకే ఈ ఏడాది ఆరంభంలో చర్చలు ప్రారంభించాయి. ఈ ఒప్పందం ప్రకారం.. రెండు దేశాలు గరిష్ఠ వస్తువులపై కస్టమ్స్‌ సుంకాలను భారీగా తగ్గించడమే లేదా తొలగించడమో చేయాల్సి ఉంటుంది. దీంతో పాటు పెట్టుబడులను ప్రోత్సహించేలా నిబంధనలను సులభతరం చేయాలి.

ఈ ఒప్పందంపై సుదీర్ఘంగా చర్చలు జరుగుతుండగా.. ఇటీవల బ్రేవర్మర్‌ వివాదాస్పద వ్యాఖ్యలు చేశారు. వీసా పరిమితి దాటిన తర్వాత బ్రిటన్‌లో నివసించే వారిలో అత్యధికులు భారతీయులే అని అన్నారు. అంతేగాక,  భారత్‌తో స్వేచ్ఛా వాణిజ్య ఒప్పందంపై ఆందోళనలు ఉన్నాయన్నారు. దీనిపై భారత్‌ దీటుగా బదులిచ్చింది కూడా. అయితే అయితే బ్రేవర్మన్‌ వ్యాఖ్యల నేపథ్యంలో ఎఫ్‌టీఏ ఒప్పందం డోలాయమానంలో పడిందని పలు అంతర్జాతీయ మీడియా కథనాలు వెల్లడించాయి. అయితే ఈ పరిణామాల తర్వాత దిద్దుబాటు చర్యలకు దిగిన యూకే.. భారత్‌తో మరింత పటిష్ఠమైన వాణిజ్య సంబంధాలను కోరుకుంటున్నట్లు ప్రకటించింది. అటు బ్రేవర్మన్‌ కూడా ఇదే రకమైన వివరణ ఇచ్చింది.