IND-AUS: అలాంటి కార్యకలాపాలను అనుమతించొద్దు.. ఆస్ట్రేలియాకు భారత్‌ విజ్ఞప్తి

దిల్లీ: ఆస్ట్రేలియాలో భారతీయులపై ఖలీస్థాన్‌ మద్దతుదారులు దాడి చేయడాన్ని భారత్‌ తీవ్రంగా ఖండించింది. భారత దేశ సమగ్రత, భద్రత, జాతీయ ప్రయోజనాలకు వ్యతిరేక కార్యకలాపాలను ఆస్ట్రేలియా భూభాగంపై అనుమతించవద్దని విదేశాంగ శాఖ కార్యదర్శి ఆరిందమ్‌ బాగ్చీ కోరారు. ఖలీస్థాన్‌కు మద్దతుగా సిక్‌ ఫర్‌ జస్టిస్‌ (SFJ) అనే ఉగ్రవాద సంస్థ సోమవారం మెల్‌బోర్న్‌లో ప్రదర్శన చేపట్టింది. అదే సమయంలో భారత్‌కు అనుకూలంగా కొందరు జాతీయజెండాలతో ప్రదర్శన నిర్వహించారు.  ఈ సందర్భంగా ఖలీస్థాన్ మద్దతుదారులు భారతీయులపై దాడి చేశారు.  ఈ ఘటనలో ఇద్దరు భారతీయులకు గాయాలయ్యాయి.  ఖలీస్థాన్‌ రెఫరెండం పేరుతో కొన్ని రాజకీయ ప్రేరేపిత అతివాద శక్తులు భారత్‌కు వ్యతిరేకంగా ఆస్ట్రేలియాలో తీర్మానం చేయడంపై భారత విదేశాంగ శాఖ తీవ్ర అసంతృప్తిని వ్యక్తం చేసింది. 

‘‘భారతీయులపై జరిగిన దాడిని తీవ్రంగా ఖండిస్తున్నాం. ఈ ఘటనపై విచారణ జరిపి, బాధ్యులైన వారిని శిక్షించాలని స్థానిక అధికార యంత్రాంగాన్ని కోరాం. నిషేధిత ఉగ్రవాద సంస్థలు చేపడుతున్న కార్యకలాపాలపై భారత్‌ ఆందోళనను ఆస్ట్రేలియా దృష్టికి తీసుకెళ్లాం. ఆస్ట్రేలియాలోని భారతీయుల భద్రత, వారి ఆస్తుల పరిరక్షణకు తగిన చర్యలు తీసుకోవాలని ఆస్ట్రేలియా ప్రభుత్వానికి  విజ్ఞప్తి చేశాం. భారత దేశ సమగ్రత, భద్రత, జాతీయ ప్రయోజనాలకు వ్యతిరేకమైన కార్యకలాపాలను ఆస్ట్రేలియా భూభాగంపై అనుమతించవద్దని ఆ దేశాన్ని కోరాం’’ అని ఆరిందమ్‌ బాగ్చీ తెలిపారు. ఆస్ట్రేలియా ప్రధాని ఆంటోని అల్బనీస్‌ వచ్చే నెలలో భారత పర్యటనకు రానున్నారు. ఈ నేపథ్యంలో భారతీయులపై దాడి జరగడంపై విదేశాంగ శాఖ ఆందోళన వ్యక్తం చేసింది.