Updated : 11 Nov 2021 15:18 IST

Raja Chari: అంతరిక్షంలోకి మన రాజాచారి.. నింగిలోకి దూసుకెళ్లిన ‘క్రూ-3’

కేప్‌ కానవెరల్‌: అమెరికా అంతరిక్ష పరిశోధనా సంస్థ, ప్రైవేటు రాకెట్‌ కంపెనీ స్పేస్‌ ఎక్స్‌ సంయుక్తంగా ప్రయోగించిన ‘క్రూ-3’ మిషన్‌ విజయవంతంగా నింగిలోకి దూసుకెళ్లింది. ఫాల్కన్‌ 9 రాకెట్‌లో నలుగురు వ్యోమగాములు అంతర్జాతీయ అంతరిక్ష కేంద్రానికి(ఐఎస్‌ఎస్‌) బయల్దేరారు. ఈ మిషన్‌కు కమాండర్‌గా వ్యవహరిస్తున్న రాజాచారి భారత సంతతికి చెందిన తెలుగు వ్యక్తి కావడం విశేషం. 

అమెరికా కాలమానం ప్రకారం.. బుధవారం రాత్రి 9 గంటలకు ఫ్లోరిడాలోని నాసా కెనడీ స్పేస్‌ సెంటర్‌ నుంచి ఫాల్కన్‌ 9 రాకెట్‌ నింగిలోకి దూసుకెళ్లింది. దాదాపు 22 గంటల ప్రయాణం తర్వాత ఈ నలుగురు వ్యోమగాములు ఐఎస్‌ఎస్‌కు చేరుకుంటారు. క్రూ-3 మిషన్‌కు రాజాచారి కమాండర్‌గా వ్యవహరిస్తుండగా.. ఆయనతో పాటు మిషన్‌ స్పెషలిస్ట్‌గా అమెరికా నేవీ సబ్‌మెరైన్‌ అధికారి కేలా బారన్‌, నాసాకు చెందిన టామ్‌ మార్ష్‌బర్న్‌ పైలట్‌గా, ఐరోపా అంతరిక్ష పరిశోధనా సంస్థకు చెందిన మత్తియాస్‌ మౌరర్‌ మిషన్‌ స్పెషలిస్ట్‌గా వెళ్లారు. వీరు ఆరు నెలల పాటు అంతరిక్ష కేంద్రంలో ఉండనున్నారు. వాస్తవానికి రెండు వారాల క్రితమే ఈ ప్రయోగం జరగాల్సి ఉండగా.. వాతావరణ పరిస్థితులు, వ్యోమగాముల ఆరోగ్య పరిస్థితుల కారణంగా ఆలస్యమైంది. 

ఎవరీ రాజాచారి.. 

భారతీయ అమెరికన్‌ అయిన రాజాచారి అమెరికా వైమానిక దళంలో కర్నల్‌ హోదాలో ఉన్నారు. ఆయన తండ్రి శ్రీనివాస్‌ వి.చారి హైదరాబాద్‌ నుంచి అమెరికాకు ఉద్యోగం కోసం వలస వెళ్లారు. అక్కడ అమెరికాకు చెందిన పెగ్గీ ఎగ్బర్ట్‌ను వివాహం చేసుకున్నారు. వారికి రాజాచారి 1977లో జన్మించారు. విస్కాన్సిన్‌లోని మిల్వాకీలో ప్రాథమిక విద్య పూర్తి చేశారు. యూఎస్‌ ఎయిర్‌ ఫోర్స్‌ అకాడమీలో ఆస్ట్రోనాటికల్‌ ఇంజినీరింగ్‌లో బ్యాచిలర్‌ డిగ్రీ పూర్తి చేశారు. ఆ తర్వాత మసాచుసెట్స్‌ ఇన్‌స్టిట్యూట్‌ ఆఫ్‌ టెక్నాలజీ(ఎంఐటీ)లో ఆస్ట్రోనాటిక్స్‌, ఏరోనాటిక్స్‌లో మాస్టర్స్‌ డిగ్రీ పొందారు. యూఎస్‌ నావల్‌ టెస్ట్‌ పైలట్‌ స్కూల్‌లోనూ విద్యనభ్యసించారు. 2017లో నాసా అస్ట్రోనాట్‌ క్యాండిడేట్‌ క్లాస్‌కు ఎంపికయ్యారు. 

రాజాచారికి ఇదే తొలి అంతరిక్ష ప్రయాణం. ఇదిలా ఉండగా.. చందమామపై అన్వేషణ కొనసాగించడానికి చేపడుతున్న ప్రతిష్ఠాత్మక ‘అర్టెమిస్‌’ మిషన్‌ కోసం నాసా 18 మంది వ్యోమగాములను ఎంపిక చేసింది. అందులో రాజాచారి ఒకరు. అన్నీ సవ్యంగా జరిగితే 2024లో రాజాచారి జాబిల్లిపై కాలుమోపే అవకాశాలున్నాయి. 


Read latest India News and Telugu News

 Follow us on Facebook, Twitter, Instagram, Koo, ShareChat and Google News.

Tags :

మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జనరల్

మరిన్ని