Afghan Crisis: కాబుల్‌ నుంచి భారతీయుల తరలింపు

దిల్లీ: కల్లోలిత అఫ్గానిస్థాన్‌ నుంచి భారతీయుల తరలింపు ప్రక్రియ కొనసాగుతోంది. కాబుల్‌ విమానాశ్రయం నుంచి శనివారం కొంతమంది భారతీయులను వాయుసేన ప్రత్యేక విమానంలో స్వదేశానికి తీసుకొస్తున్నారు. ఈ ఉదయం 85 మందికి పైగా భారత పౌరులతో సి-130జె విమానం కాబుల్‌ ఎయిర్‌పోర్టు నుంచి బయల్దేరినట్లు తెలుస్తోంది. ప్రస్తుతం ఆ విమానం ఇంధనం నింపుకొనేందుకు తజకిస్థాన్‌లో దిగినట్లు ప్రభుత్వ వర్గాలు వెల్లడించాయి.

ఇక వాయుసేనకు చెందిన మరో సి-17 విమానం కూడా కాబుల్‌ ఎయిర్‌పోర్టులో ఉంది. భారతీయులను తీసుకుని ఆ విమానం కూడా త్వరలోనే స్వదేశానికి బయల్దేరనున్నట్లు తెలుస్తోంది. ఇటీవల అఫ్గాన్‌లోని భారత రాయబార కార్యాలయ సిబ్బందిని ప్రత్యేక విమానంలో స్వదేశానికి తరలించిన విషయం తెలిసిందే.

తాలిబన్లు అఫ్గానిస్థాన్‌ను ఆక్రమించిన తర్వాత ఆ దేశ గగనతలాన్ని మూసివేశారు. దీంతో భారతీయుల తరలింపు ప్రక్రియకు ఆటంకం ఏర్పడింది. అయితే ఆ తర్వాత అమెరికా దళాల సహకారంతో భారత్‌ ప్రత్యేక విమానాల్లో భారతీయుల తరలింపునకు ఏర్పాట్లు చేసింది.