Saudi Visa: భారతీయులకు సౌదీ గుడ్‌న్యూస్‌.. వీసాకు ఆ క్లియరెన్స్‌ అక్కర్లేదు

దిల్లీ:  సౌదీ అరేబియా (Saudi Visa) భారతీయులకు గుడ్‌న్యూస్‌ చెప్పింది. సౌదీ వెళ్లాలనుకునే భారతీయులు ఇకపై వీసా కోసం పోలీస్‌ క్లియరెన్స్‌ సర్టిఫికెట్‌ సమర్పించాల్సిన అవసరం లేదని ఆ దేశం స్పష్టంచేసింది. ఈ మేరకు భారత్‌లోని ఆ దేశ రాయబార కార్యాలయం ట్విటర్‌ ద్వారా ఈ విషయాన్ని వెల్లడించింది. భారత్‌తో తమ దేశానికి ఉన్న బలమైన వ్యూహాత్మక బంధం దృష్ట్యా వీసాల కోసం పోలీస్‌ క్లియరెన్స్‌ను రద్దు చేస్తున్నట్లు తెలిపింది. దీనిద్వారా ఇరు దేశాల మధ్య బంధం మరింత బలపడుతుందని పేర్కొంది.

సౌదీ తీసుకున్న ఈ నిర్ణయం ద్వారా వీసా అప్లికేషన్ ప్రక్రియ వేగవంతం కానుంది. పర్యాటక సంస్థలకు పని సులభతరం కానుంది. ఆ మేరకు టూరిస్టులకు డాక్యుమెంట్ల భారం తగ్గనుంది. ప్రస్తుతం దాదాపు 20 లక్షల మంది భారతీయులు ప్రశాంతంగా సౌదీ అరేబియాలో జీవిస్తున్నారని ఆ దేశం తెలిపింది. వాస్తవానికి సౌదీ రాజు మహ్మద్‌ బిన్‌ సాల్మన్‌ ఈ నెల భారత్‌లో పర్యటించాల్సి ఉంది. ప్రధాని మోదీతో భేటీ కావాల్సి ఉంది. అనివార్య కారణాల వల్ల పర్యటన రద్దయ్యింది.