Rajnath Singh: ఆల్‌ టైం గరిష్ఠానికి రక్షణ రంగ ఎగుమతులు

దిల్లీ: భారత్‌ నుంచి రక్షణ రంగ ఎగుమతులు(Defence Exports) ఆల్‌ టైం గరిష్ఠానికి చేరుకున్నాయి. 2022- 23 ఆర్థిక సంవత్సరంలో ఏకంగా రూ.15,920 కోట్ల మేర రక్షణ ఉత్పత్తులు, సాంకేతికతలను విదేశాలకు సరఫరా చేసినట్లు రక్షణశాఖ మంత్రి రాజ్‌నాథ్ సింగ్(Rajnath Singh) వెల్లడించారు. దేశ ప్రగతికి ఇదో నిదర్శనమని పేర్కొన్నారు. ప్రధాని నరేంద్ర మోదీ(Narendra Modi) సైతం ఈ ఘనతపై హర్షం వ్యక్తం చేశారు. ఈ రంగంలో చేపట్టిన సంస్కరణలు మంచి ఫలితాలు అందిస్తున్నాయని చెప్పారు.

‘2022- 23లో దేశ రక్షణ ఎగుమతులు రూ.15,920 కోట్లతో ఆల్ టైమ్ గరిష్ఠానికి చేరుకున్నాయి. భారత్‌కు ఇది గొప్ప విజయం’ అని రాజ్‌నాథ్ సింగ్ శనివారం ట్విటర్‌ వేదికగా తెలిపారు. ఈ ట్వీట్‌పై ప్రధాని మోదీ స్పందిస్తూ.. ‘ఎక్స్‌లెంట్‌. భారతీయుల ప్రతిభ, ‘మేక్ ఇన్ ఇండియా’ పట్ల గల ఉత్సాహానికి ఈ గణాంకాలే నిదర్శనం. ఈ రంగంలో చేపట్టిన సంస్కరణలు మంచి ఫలితాలు అందిస్తున్నాయని ఇది నిరూపిస్తోంది. భారత్‌ను రక్షణ ఉత్పత్తుల కేంద్రంగా మార్చే ప్రయత్నాలకు కేంద్రం మద్దతు ఇస్తూనే ఉంటుంది’ అని పేర్కొన్నారు.

ఇదిలా ఉండగా.. రూ.1.75 లక్షల కోట్ల విలువైన రక్షణ ఉత్పత్తుల తయారీతోపాటు 2024-25 నాటికి ఈ ఎగుమతులను రూ.35 వేల కోట్లకు చేర్చాలని కేంద్రం లక్ష్యంగా పెట్టుకొంది. ఈ క్రమంలోనే.. ‘మేక్‌ ఇన్‌ ఇండియా’ స్ఫూర్తితో దేశీయ రక్షణ ఉత్పత్తి రంగాన్ని ప్రోత్సహించేందుకు అనేక చర్యలు తీసుకుంటోంది. అధికారిక వివరాల ప్రకారం.. 2021-22 ఆర్థిక సంవత్సరంలో దేశ రక్షణ ఉత్పత్తుల ఎగుమతులు రూ.12,814 కోట్లు, 2020-21లో రూ.8,434 కోట్లు, 2019-20లో రూ.9,115 కోట్లు, 2018-19లో రూ.10,745 కోట్లుగా ఉంది.