Anji Khad Bridge: దేశంలో తొలి తీగల రైల్వే వంతెన సిద్ధం.. కేబుళ్ల పొడవు ఎంతో తెలుసా!

శ్రీనగర్: భారత రైల్వేశాఖ (Indian Railway) మరో ఘనత సాధించేందుకు చేరువైంది. జమ్మూలోని (Jammu) రైసీ జిల్లాలో చేపట్టిన దేశ మొట్టమొదటి తీగల రైల్వే వంతెన (Anji Khad Bridge) నిర్మాణం సిద్ధమైంది. రైల్వేశాఖ మంత్రి అశ్విని వైష్ణవ్‌ (Ashwini Vaishnaw) ఈ విషయాన్ని వెల్లడించారు. 11 నెలల వ్యవధిలో ఈ కేబుల్‌ రైల్వే బ్రిడ్జ్‌ నిర్మాణం పూర్తిచేసినట్లు ఆయన ట్విటర్‌ వేదికగా తెలిపారు.

వంతెనను మొత్తంగా 96 ప్రధాన తీగలతో అనుసంధానించినట్లు రైల్వే మంత్రి చెప్పారు. మొత్తం తీగల పొడవు 653 కిలోమీటర్లు ఉందని వెల్లడించారు. తీగల అమరిక పనులకు సంబంధించిన వీడియోనూ ఈ సందర్భంగా పోస్ట్‌ చేశారు. ఈ ట్వీట్‌పై స్పందించిన ప్రధాని నరేంద్ర మోదీ (Narendra Modi).. ‘ఎక్స్‌లెంట్‌’ అని ప్రశంసించారు. సుమారు రూ.400 కోట్ల వ్యయంతో ఈ వంతెన పనులు చేపట్టారు. మొత్తం పొడవు 725 మీటర్లు.

అంజీ ఖడ్‌ తీగల రైల్వే వంతెన.. జమ్మూ- బారాముల్లా మార్గంలోని కాట్రా- రైసీ సెక్షన్లను కలుపుతుంది. హిమాలయ పర్వతాల మధ్య అంజీ ఖడ్‌ నదిపై దాదాపు 1086 అడుగుల ఎత్తులో దీన్ని నిర్మించారు. ఈ బ్రిడ్జి 216 కిలోమీటర్ల వేగంతో వచ్చే గాలులను కూడా తట్టుకుంటుందని అధికారులు చెబుతున్నారు. ఈ వంతెనను తొలుత చీనాబ్‌ నదిపై నిర్మించిన ఆర్చ్‌ బ్రిడ్జి తరహాలో నిర్మించాలనుకున్నారు. కానీ, భౌగోళిక పరిస్థితులను దృష్టిలో ఉంచుకొని చివరికి తీగల వంతెనను ఖరారు చేశారు.